Naalakkersuisoq piginnaanilinnut takutitsinermut unammillerneqartoq: Peqqissutsimut isumaqatigiissummut soqutiginninneq annikitsoq
Peqqissutsimut isumaqatigiissut innuttaasunut saqqummiukkiartorlugu Peqqissutsimut Naalakkersuisoq Sisimiuniippoq. Isumaqatigiissut pillugu tusarnaariartut qulit missaaniittut, piginnaanilinnut takutitsinermut takkuttut inuit 200-missaaniipput.
Kulturikkut illorsuup Taseraliup biilinik uninngasarfia unnukkut nalunaaqutaq arfineq-marlunnguinnartoq ulikkaavippoq. Inuppassuimmi Taseralimmukaapput. Peqqissutsimut Naalakkersuisup innuttaasunik ataatsimiisitsineranut imaluunniit Qeqqata Kommuniata piginnaanilinnulluunniit takutitsinermut aaqqissuussaanut peqataajartorput.
Inatsisartuni partiit peqqinnissaq oillugu aqutsisoqarfiit nukittorsarnerannut politikkikkut tunngaviusumik peqqissutsimut tunngatillugu siorna novembarimi isumaqatigiissuteqarput. Taassumallu imaa Sisimiuni innuttaasunut saqqummiunniarlugu Peqqissutsimut Naalakkersuisoq, Agathe Fontain sisimiunukarpoq.
Piffissamilu tassanerpiaq Qeqqata Kommunia piginnaanilinnut takutitsinissamut aaqqissuussaqarpoq, piginnaaneqarnerpaat aningaasanik tusindilikkaanik pinnatassaqarlutik.
Peqqinnissaq pillugu soqutiginninneq annikitsoq
Taseralimmut iseraanni inuppassuit arajutsisassaanngillat. Piginnaaninik takutitsineq inersuarmi anginermi pivoq, tassani inuit 200-ut missaaniittut isersimallutik. Inuit ilai issiavissaqannginnamik nikorfallutik isiginnaarput. Inimilu minnermi Naalakkersuisup saqqummiinerani inuit qulit missaaniittut isersimapput, sulilu issiavissaqaqaluni.
Ersaattaappalunnerit nuannaarlutillu nilliarpalunnerit tusaaneqarsinnaasut Peqqinnissamut Naalakkersuisup sumi najugaqarneq apeqqutaatinnagu pinartumik nalinginnaasumillu katsorsaasarnissamik qulakkeerinninneq, kræftertunut ikiorsiissutit nutaat, toqqissilluni ernineq naartunerlu, tarnikkut nappaatilinnik sullissineq, peqqinnissaqarfimmi sulisunik sulisussarsiortarnermut sulisullu sulisoriinnarnissaannut pitsaanerusumik tunngavissaqarneq, kiisalu peqqinnissaqarfik nutaaliaasoq Kalaallit Nunaanni pissutsinut naleqqussagaq saqqummiuppai.
Inuk qitiutillugu sulineq
Peqqinnissamut Naalakkersuisup peqqissutsimut tunngatillugu isumaqatigiissut saqqummiutereeraalu takkuttut apeqquteqarsinnaanngorput. Ilaatigut apeqqutigineqarpoq nakorsap napparsimasunut passussinissaminnut piffissaa. Napparsimasut ilaatigut nakorsap piffissaqalernissaanut utaqqisariaqartarnerat apeqquserneqarpoq, ilaatigut oqaatigalugu inuk qitiutillugu sulinerusariaqannginnersut, nakorsap piffissaa qitiutinnagu.
Ataatsimiinnermi oqaatigineqartut apeqqutigineqartullu naalakkersuisoqarfimmiit allattorneqarput.
Kukkusumik paasissutissiineq
Naalakkersuisup innuttaasunik ataatsimiisitsisussaanera pillugu Taseralimmi allanik aaqqissuussisoqassanersoq naalakkersuisoqarfik paasiniaasimavoq, ataqatigiissaarinermullu tunngasunik kukkusumik paasissutissinneqarsimallutik, naalakkersuisoqarfik paasissutissiivoq. Oqaatigineqarsimammat Taseralimmi ullormi tassani aaqqissuussisoqartussaanngitsoq.
- Erloqinaqaaq, piffissaq allanngortissimasinnaagaluarparput aaqqissuusisoqarsimasoq paasitinneqarsimagaluarutta, Naalakkersuisup allattaa, Nukaaka Tobiassen Sermitsiaq.AG-mut oqarpoq.