Naalakkersuisoqarfimmi pisortaq suliunnaartoq
Karsten Peter Jensen Ilinniartitaanermut, kultureqarnermut, Timersornermut Ilageeqarnermullu Naalakkersuisoqarfiup pisortaatut suliunnaarpoq. Naalakkersuisup siunissami pitsaanerpaamik kissaappaa.
- Ajuusaarutigalugu nalunaarutigissavarput, Karsten Peter Jensenip soraarniutaa tigusimagatsigu.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen taamatut oqarpoq.
Karsten Peter Jensen ukiuni arfineq-pingasuni naalakkersuisoqarfimmi sulisimavoq, ukiullu marluk ukiullu affaani naalakkersuisoqarfimmi pisortatut atorfeqarsimalluni.
- Taamaalilluta naalakkersuisoqarfimmi pisortaq pikkorissoq ukiorpassuarni Naalakkersuisoqarfimmut sullissilluarsimasoq annaavarput, Peter Olsen, Karstenip sulilluarsimaneranut suliatigullu Naalakkersuisunut ukiorpassuarni siunnersuilluartarsimaneranut qujassuteqartoq oqarpoq.
Naalakkersuisup siunissami pitsaanerpaamik kissaallugu oqaatigaa.
Aalajangerniarneq ajornaatsuinnaasimanngitsoq
Karsten Peter Jensen nammineq kissaateqarnermigut suliunnaarpoq, erseqqissaatigaali aalajangerniarneq ajornaatsuinnaasimanngitsoq.
- Inuunermi eqqortumik tulleriiaarinissaq qinertariaqarpoq. Taamaattumik qinersimavara Naalakkersuisoqarfimmi atorfinnit tunuarnissaq, taanna oqarpoq, nangillunilu:
- Ukiuni arlalinni suleqaterpassuit suleqatiginissaat pissanganartuusimavoq nuannersuullunilu. Taakkua qulakkeerinneqataaffigisimavaat, suliartornissara nuannarisimagakku.
Karsten Peter Jensenip suleqatigisimasani aamma avataaniit suleqatigisimasani nersualaarpai.
- Ukiuni kingullerni suleqatigiilluarsimanitsinnut qujanaq.