Ussassaarut
Naalakkersuisoqarfiup pisortaa: Aalisarneq pillugu inatsit nutaaq upperigaa
Naalakkersuisoqarfiup pisortaatut toqqarneqaqqittoq Jørgen Isak Olsen suliassap imaannaanngitsuuneranik ilisimaarinnippoq, taamaattorli aalisarneq pillugu inatsimmik nutaamik politikkikkut akuersissutiginnitsitsisinnaanini upperinerarlugu.
Ussassaarut
Ussassaarut
Ussassaarut
Sermitsiaq.AG-p Jørgen Isak Olsen apriilimi oqaloqatigimmagu, taanna ukiuni aalajangersimasuni atorfeqartussaanermi qaangiunnerata kingorna atorfini qinnutigeqqissanerlugu suli aalajangersimanngilaq. Nuliami tamatuminnga oqaloqatiginissaa amigaatigigamiuk.
Kisianni nulia sulisitsisualu akimmisaartitsisimanngillat, taamaammallu naalakkersuisoqarfiup pisortaata suliaq, 2013-imi atorfimmi sulileramili aallartissimasani, nangissinnaanngorpaa.
- Atorfiup sunik imaqarnera siunissamilu sunik suliassaqarnera isumaliutigisimavakka, naliliillunga, tamanna suli siuttuuffigerusukkiga, Jørgen Isak Olsen Sermitsiaq.AG-mut oqarpoq.
Naalakkersuisoqarfiup pisortaata naalakkersuisoqarfiup iluani allaffissornerup pitsanngorsarneqarnera, ersarinnerusumik suleriaaseqalerneq aamma aalisartut nalunaaruteqartarnerannik digitaliseeriineq kiisalu qarsaasiasornermi periusissiaq nutaaq sulianut ingerlanneqartunut assersuutitut eqqaavai.
Suliassalli pisortap nerrivianiittut annersaat tassaasimassaaq aalisarneq pillugu inatsisissamik nutaamik suliaqarneq.
- Aalisarneq pillugu Ataatsimiititaliarsuup suliaa naammassereerpat politikkimut tunngasortaa isumagisussaavarput, oqarpoq, erseqqissaallunilu, ataatsimiititaliarsuarmit inassuteqaat politikkikkut tapersersorneqarneranik isumaqartariaqanngitsoq.
Ussassaarut
Naammassineqartissaqqaaraa
Kisianni naalakkersuisoqarfiup pisortaata upperaa, illuatungeriit naapeqatigiissisinnaagini inatsillu nutaaq akuerineqartillugu.
- Sulisitsisut, KNAPK, SIK, Pinngortitaleriffik peqatigalugit uagullu naalakkersuisoqarfimmeersut peqataaffigisatsinnik suleqatigiissitami ilaasimavunga. Suliassat tassani aaqqinniarnerat iluaatsilluarsimavoq, taamaammat politikerini suliassat aamma ingerlalluartissinnaavakka, oqarpoq.
- Naalakkersuisoq inaarutaasumik soorunami aalajangiisussaavoq, kisianni kaammattorusuppara illuatungiliuttut namminerlu tunuliaquttani oqaloqatigeqqullugit. Taava uagut (atorfilittat, aaqq.) suliami ikiuutissaqqaarpugut, Jørgen Isak Olsen oqarpoq.
Aalisarnermut, Piniarnermut Nunalerinermullu Naalakkersuisoq, Jens Immanuelsen, naalakkersuisoqarfimmi pisortaata suliinnarnissaanut isumalluarpoq.
- Aalisarneq pillugu inatsisissaq Jørgen Isak Olsen suliami siuttoralugu siunissami ungasissorsuunngitsumi naammassineqarsinnaassasoq neriuutigalugulu upperaara. Tamannalu qilanaaraara, oqarpoq.