Naalakkersuisunngortitsiniarneq aallartilersoq
Nunatsinni partiit sisamanngornermi ualikkut partiimik ajugaalluartumik 'kaffisoqateqassapput' oqaloqatigiissallutik
Siullermik Atassut.
Taava Partii Inuit.
Kingorna Demokraterne.
Naggataatigullu Inuit Ataqatigiit.
Sisamanngornermi ualikkut Siumut marlunngornermi Inatsisartunut qinersinermi ajugaarujussuarnerup kingorna Naalakkersuisunik nutaanik pilersitsinissamut partiinik oqaloqatiginninnissaat taama tulleriiaagaavoq. Oqaloqatiginninnerit aallarniutaapput sapaatip akunnerata tulliani naalakkersuisooqatigiinnik pilersitsivinnissamut isumaqatigiinniartoqarnissaanut piareersaatitut.
- Tulleriaarnerit annermik isumaqanngillat. Partiit minnerit kaffisoriartoqquagut oqaloqatigilaarniarlugit, Siumup siulittaasua Aleqa Hammond pingasunngornermi ualikkut namminersorlutik oqartussani tusagassiivinnik katersortitsinermik najuuffigineqarluartumi oqarpoq.
Isumaqatigiinniutissat qitiat
- Naalakkersuisunngortitsinissaq ulapputiginngilarput. Sapaatip-akunnerata uuma sinnera atussavarput partiit sunik uummammioqarnersut paasiniaaffigalugit aamma Siumumik suleqateqarnissaq qanoq takorloorneraat. Eqqissisimasumik pissuseqarnissaq pingaaruteqarpoq suleqatissamik suleqatissanilluunniit marlunnik pilersitsisoqassatillugu, Aleqa Hammond oqarpoq.
Naalakkersuisunut siulittaasunngortussap erseqqissaatigaa aatsitassarsiortunut akitsuutinik eqqussisoqassasoq, aatsitassanik piiaanermi saniatigut uranitalinnik piiaasoqarsinnaanngilluinnarnerata atorunnaarsinneqarnissaa, aalisarnermi pitsanngorsaatit, suliffissaaleqinerup akiorniarneqarnissaa aamma sineriammi tunitsiviit amerlineqarnissaat isumaqatigiinniarnerni qitiussapput.