Naalakkersuisussat isumaqatigiinniutigineqarnerat: Qaa maannakkut
Naalakkersuisooqatigiittussat nutaat isumaqatigiinniutigineqarnerat naammassiartuaalerpoq. Isumaqatigiinniarnermi siuttuusup Kuupik Kleistip maannakkorpiaq issiaqatigai Jens B. Frederiksen aamma Palle Christiansen, Demokratit, Finn Karlsen, Atassut kiisalu Anthon Frederiksen, Kattuseqatigiit Partiiat.
'Killiffik' naatsumik ataatsimiinnerup taassuma qulequtaraa, minutsialunnguit qaangiuttoq IA-p ataatsimiittarfiani namminersornerusuni partiit allaffiisa torsuusaanni. Inatsisartuni maannakkut partiinit annersaalersumi siulersuisuunerit aamma inatsisartunut ilaasortat akornanni uipakajaaqqajaaneq malunnaatilimmik annertuvoq. Ataatsimeeqattaarnerit sivisuut kiisalu partiip politikikkut siunnersuutissai pillugit eqimattakkaarluni sulinerit qasuersaarnissamut inissaqartitsivallaanngillat.
Ataatsimiinnerup kingorna erseqqissuusussaavoq partiit sorliit siunissami Inuit Ataqatigiinnik naalakkersuisuni suleqateqarniarnersut - suleqatigiinneq partiit sisamat peqataasut tamarmik neriorsuutigisimasaat ukiuni sisamani attanniarlugu - upernaakkut 2013-ip tungaanut.
Demokratit siulittaasuat Jens B. Frederiksen aamma siulittaasuata tullia Palle Christiansen ataatsimiinneq sioqqutitsiarlugu oqarput ataatsimiigiarlutik naapeqatigiinnissaq piumassuseqarfigalugu.
- Soorunami uagut suleqatigiittoqassappat piumasarisavut ilanngukkusuppavut, kisianni malartaasernianngilagut. Naaperiaanermi isumaqatigiissutit maannakkuinnaq atuuttuusussaanngillat, ukiuni sisamani atasussanngorlugit isumaqatigiissutigineqassapput.
Atassutip siulittaasua Finn Karlsen utaqqimaaneruvoq.
- Uanga naluara suna saqqummiunneqarniarnersoq. Ilisimatinneqarniaannarluta ataatsimiigiaqqusaavugut, allamik oqaaseqarsinnaanngilanga.
Kattusseqatigiit Partiiata siulittaasua Anthon Frederiksen aamma tusarliussaqarusuppallaanngilaq.
- Neriunneq suli piuvoq, ataatsimiinnissamut ilisimasuutinut akissutigisaa naatsoq taamaappoq.
Sermitsiaq paasisai malillugit ataatsimiinneq naalakkersuisooqatigiinnissamut isumaqatigiissuteqarnissamut aalajangiisuussaaq. Ilaatigut paasinarsitinniarneqarpoq partiit sorliit aningaasaqarnermut tunngasutigut aalajangiinissamut peqataarusunnersut, naalakkersuisut nutaassat sulinissaminnut pilersaarutaannut sunniuteqartussanik.