Naalakkersuisut aalisarneq pillugu isumasioqatigiissitsinissamut piareertut

Aalisanermut Piniarnermullu Naalakkersuisup Aqqaluaq B. Egedep nunami aalisarnerup siunissaa pillugu oqallitsitsinissamut, aaliasartut aalisarnermillu suliaqartut peqataatinniarlugit aalisarneq pillugu isumasioqatigiissitsinnissaq nutaamik ullulersimavaa.

Isumasioqatigiinneq sumiiffinni marlunni ingerlanneqassaaq, isumasioqatigiinneq siulleq Ilulissani martsip aappaani pingajuanilu ingerlanneqassaaq, tamatumalu kingorna Nuummi martsip qulingiluaani qulinganilu oqallinneq nangeqqinneqassalluni.

Aalisarneq pillugu Ataatsi­miititaliarsuup isumaliutissiissutaa, 2021-mi aasakkut saqqummiunneqartoq tunngavigalugu isumasioqatigiittoqassaaq, Naalakkersuisullu aalisarneq pillugu inatsisissaq nutaaq naammassitinnagu isumasioqatigiinnermi aalisarnermi suliaqartut tusaqqaarusussimavaat.

Aalisarnermik suliaqartut januaarimi isumasioqatigiissinneqarnissaanik pilersaarutaasimasoq, Nunatsinni coronap atugaanera pissutigalugu piffissaligaanngitsumik kinguartinneqarsimavoq.

- Aalisartunik oqaloqateqarnissara nunatsinnilu innuttaasut tamarmik inatsimmut taamak pingaaruteqartigisumut isummersoqataanissaannut oqalliseqataanissaannullu

pingaar­tit­si­orujussuuvunga. Aalisarneq nunatsinni aningaasarsiornermut tunngavi­liisuuvoq, taamaammat suliamut taama pingaaruteqartigisumut innuttaasut tamaasa tusarnissaat pingaaruteqarpoq. Aalisarneq pillugu isumasioqatigiinnerit tunngavigalugit siunissami aalisarneq pillugu aalisartunik oqaloqateqartarnissap aallartinnissaa qilanaarivara, Aqqaluaq B. Egede tusagassiorfinnut nalunaaruteqarnermi oqarpoq.

Nutaamik inatsiseqartariaqalersoq

Aalisarneq pillugu Ataatsimiititaliarsuup isumaliutissiissutaa tamanut saqqummiunneqarmat, Naalakkersuisut aalisarneq pillugu nutaamik inatsisiliornissaq suliassarilerpaat. Aalisarneq pillugu inatsit nutaaq nunami isumalluutinik nungusaataanngitsumik atuinissamik nunamilu aalisartut isertitaqarnissaannik qulakkeerinninnissamik oqimaaqatigiissitsissaaq.

Isumasioqatigiinnissaq, aalisartut amerlanerusutaalisarnermillu suliaqartut amerlanerusut peqataasoralugit aalisarneq pillugu inatsisissamut nutaamut ilanngussinissaat qulakkeerniarlugu sumiiffinni marlunni ingerlanneqassaaq.

Isumasioqatigiinneq toq­qaan­nartumik internet aqqutigalugu tamanit malinnaavigineqarsinnaassaaq.