Naalakkersuisut aaqqiagiinngissuteqarnertik innuttaasunut isertuukkaat
Tusagassiutinut nalunaarut, Inuussutissarsiornermut naalakkersuisoqarfiup Aningaasaqarnermullu naalakkersuisoqarfiup soraarnerussutisiaqalernissamut ileqqaarisarnermi aaqqiagiinnginnerannik takussutissaqartoq, avammut nassiuteriaannaagaluartoq, Naalakkersuisunit qaammatini marlunnit sivisunerusumik saqqummiunneqarsimanngilaq.
Namminersorlutik Oqartussani naalakkersuisoqarfik, naalakkersuisoqarfiup allap akisussaaffigisaanik suliami misissuititsinissamik avaqqussilluni piumasaqarpoq. Taama iliorneq siornatigut tusarneqarsimanngisaannartoq, tusarfiit oqaluttuarput.
Eqqartuussissuserisut misissuinerat eqqunngitsunik inerniliussaqarpoq, taamaasilluni Naalakkersuisoq Vittus Qujaukitsoq eqqunngitsumik eqqartorneqarlunilu assuarlerneqarluni.
Oqaluttuaq Sermitsiaq.AG-p allagaatinik takunnissinnaaneratigut saqqummerpoq, oqaluttuarli siusinnerungaatsiartukkut saqqummersimasinnaagaluarpoq.
Tusagassiutinut nalunaarut 13. februar ullulerneqarsimavoq
Allagaatini Sermitsiaq.AG-p tigusaani ilaavoq tusagassiutinut nalunaarut, suli avammut saqqummiunneqarsimanngitsoq. Nalunaarut ukioq mannamut 13. februar ullulerneqarsimavoq.
Nalunaarummi allanneqarsimavoq Naalagaaffiup eqqartuussissuserisuata Akileraartarnermut Aqutsisoqarfik soraarnerussutisiaqalernissamut ileqqaarinissamut aaqqissuussinermi suliami kukkusimanngitsutut nalileraa.
Taama naliliineq eqqartuussissuserisut suliffeqarfiata DLA Piperip naliliinerata illuatungerluinnaanik inerneqarpoq. DLA Piper allakkiamini 31-nik quppernilimmi inerniliigaluarpoq, Akileraartarnermut Aqutsisoqarfik inatsimmik malinnissimanngitsoq.
Oqartussat susassaqartut peqataatinneqanngitsut
- Allakkimi misissorneqarpoq soraarnerussutisiaqalernissamut ileqqaarisarnermut aaqqissuussinermi allaffissornikkut ingerlatsinermi inatsisit malinneqarsimanersut. Allakkiap suliarineqarnerani oqartussat susassaqartut peqataatinneqarsimanngillat, tusagassiutinut nalunaarummi ilaatigut allassimavoq.
Allakkiaq DLA Piperimeersoq inuussutissarsiornermut naalakkersuisumit Jess Svanemit suliakkiutaavoq, aningaasaqarnermullu Naalakkersuisumut, Vittus Qujaukitsumut, januarip 27-ani ammasumik siunersuisoqalinnginnerani tunniunneqarsimalluni:
- Siunersiuinissaq sioqqullugu allakkiap imarisaanut isummernissamut piffissaasuanarmat, Aningasaqarnermut Naalakkersuisoq aalajangerpoq soraarnerussutisiaqalernissamut ileqqaarisarnissamut Inatsisartut inatsisaat malinnagu ilumut sulisoqarsimanersoq, Naalagaaffiup eqqartuussissuserisua naliliitikkumallugu saaffiginiarlugu.
Martsip 19-ani akuerineqartoq
Tusagassiutinut nalunaarut taariikkatsitut februarip 13-anut ullulerneqarsimasoq, Naalagaaffiup eqqartuussissuserisuunerata DLA Piperip naliliinera assignagu Akileraartarnermut Aqutsisoqarfiup inatsimmik malinnilluni sulineranik nalileeqqammernerata kingorna allanneqarpoq. Naalagaaffiup eqqartussissuserisua februarip qulingani oqaaseqaateqarpoq.
Naalagaaffiup eqqartuussissuserisuata oqaaseqaataata tiguneqareerneranit, qaammat ataaseq qaangiutereersorlu Naalakkersuisut ataatsimiissutigaat. Martsip 19-ani ataatsimiissutigineqarpoq, Naalakkersuisullu aalajangerput Vittus Qujaukitsup tusagassiutinut nalunaarutaa qaammat sinnerlugu utaqqisinneqarsimasoq, avammut saqqummiussinnaanngortoq.
Qujaukitsulli Aningaasaqarnermullu Naalakkersuisoqarfiup tusagassiutinut nalunaarut, Akileraartarnermut Aqutsisoqarfiup kukkunani sulisimaneranut tunngasoq, suli nassiutinngilaaat. Sermitsiaq.AG-p paasisai naapertorlugit coronavirusip martsip qiteqqunnerani tunillaassulersimanera tamassumunnga pissutaaqataavoq.