Naalakkersuisut akileraarutit bruttot eqqunniarpaat
Naalakkersuisut pilarsaarutigaat akileraarutit bruttot eqqunnissaat, aavataaniit suliartortut akileraartinneqarnerisa allaffissornikkut eqaannerunissaa peqqutiginerullugu.
Tamanna aalajangiunneqarpoq siunissami nunatsinni piffissami sivikinnerusumi nunanit allannit suliartortussat nunanit assigiinngitsuniit aggerfeqartut peqqutigalugit.
- Avataaniit suliartortussat pineqartut akileraartarnissaasa allanngortinneqarneranni siunertaavoq qulakkeerniarlugu nunatta karsiata atortulersuuteqarnikkut peqqinnissakkullu assigisaanilu aningaasartuuteqarnissaata matussutissaqartinnissaa, nunatsinnimi annertuunik nunanit allaniit aningaasaliisoqarnerata tamakku kingunerissammagit, soorlu Alcoamut tunngatillugu suliniummi, kiisalu inuutissarsiornikkut, suliffeqarnikkut ineqarnermullu politikkip allanngortinneqarneranni aningaasartuutissat.
- Aamma pingaartinneqarpoq pinngortitami pisuussutit inuiaqatigiinnit tamanit pigineqarnissaat, taama tusagassiuutitigut nalunaarummi allassimavoq aningaasaqarnermut naalakkersuisup Palle Christiansenip (Demokraatit) aammalu Enok Sandgreenip KANUKOKA-p siulittaasuata isumaqatigiissumik atsiornerannut atatillugu.
Illuatungeriit aamma isumaqatigiissutigaat kommunit suliniutinut takkuttussanut aningaasartuuteqarnerunissaat. Akileraarutitigut bruttokkut akileraarutit aamma Namminersorlutik Oqartussat kommunillu ukiumoortumik ataatsimoortumik tapiissutit pillugit isumaqatigiinniarneranni ilaasassapput.