Naalakkersuisut allatut periuseqalerniarput: Saarullinniarnermi piujuartitsinissaq nalunaarutigigaat
Sinerissap qanittuani ikerinnaasiorlunilu saarullinniarnermi pisassiissutinik aqutsinermut pilersaarutip nutaap peqassutsinik piujuartitsilluni atuineq qulakkiissavaa.
Saarullinniarnermi ukiuni arlalinni biologit siunnersuinerat annertuumik qaangerneqartareersoq, Naalakkersuisut maanna saarullinnik pisassiisarnerup aqunneqarnerani piujuartitsisumik atulersitsiniarput.
Siunnersuisarnerup aaqqissuuteqqinneqarnerata kingorna aammalu nuna tamakkerlugu 2024-mut 15.000 tonsit missaannik annertusineqarnerata kingorna, anguniagaq angujuminarnerulerpoq, piffissamilu tassani aqutsinermut pilersaarut nutaaq atuutilersinneqassaaq.
Siunnersuinerup nutarterneqarneranut atatillugu Kalaallit Nunaat tamakkerlugu saarullinniarnermik aqutsinermut pilersaarummik suliaqarneq aallartinneqassasoq, Naalakkersuisut tusagassiuutinut nalunaarummi allapput.
- Taanna sinerissap qanittuani avataanilu atuutissaaq. Aalisaqatigiit tamaasa qularnaatsumik piuaannartitsineq tunngavigalugu aalisarluarneqarnissaannut atuutissalluni, Naalakkersuisut allapput.
Siunnersuinernik qaangiisut
Aalisagaqassutsimik piujuartitsisumik atuineq nalinginnaasumik ilisimatuussutsikkut siunnersuinerup malinneqarneranik paasineqartarpoq, tamakkiisumik atuineq tamatumalu peqatigisaanik kinguaariit tulliisa aalisarnerannik ulorianartorsiortitsisinnaasumik aalisapiluttoqannginnissaanut illersuisoqartarluni.
Ilisimatuussutsikkut siunnersuinerit saarullinniarnermi malinneqartanngillat. Pinngortitaleriffiup naatsorsuinera naapertorlugu, assersuutigalugu Tunumi 2022-mi siunnersuineq 8.768 tonsiuvoq, pisassiissutillu 27.430 tonsiupput. Kitaani siunnersuineq 9.560 tonsiuvoq, pisassiissutillu 21.000 tonsinut inissinneqarput.
2024-mulli siunnersuineq oqaatigineqareersutut annertuumik qaffanneqarpoq, Naalakkersuisullu oqarnerat naapertorlugu suleqatigiissitanik pilersitsiniarluni susassaqartunut qaaqqusissutinik nassiussisoqarsimavoq, aalisarnermut kattuffinnut aamma Pinngortitaleriffimmut, taakku aqutsinermut pilersaarut nutaaq suliarissavaat.
Aalisakkanut tamanut pisassiisarnermi aqutsinermi pilersaarutinik anguniagaqarneq
Naalakkersuisut aalisakkat tamaasa aqutsinissamik pilersaarusiuunnissaat anguniarpaat, aalisarnerup ammasumik aamma patajaatsumik allaffissornikkut ingerlanneqarnissaa qulakkeerumallugu, tusagassiuutinut nalunaarummi oqaatigineqarpoq.
Maanna ilaatigut sinerissap qanittuani saarullinniarnermi aqutsinermut , kiisalu sinerissap qanittuani qaleralinniarnermut pilersaaruteqanngilaq.
Sinerissap qanittuanilu aamma biologit siunnersuinerat annertuumik aamma qaangerneqarpoq. Naalakkersuisuusimasut Siumumeersoq Kim Kielsen siulittaasoralugu, biologit siunnersuutaannut ukiuni sisamani sinerissap qanittuani qaleralinniarnermi pisassiissutit naleqqussarnissaannut pilersaaruteqarsimapput.
Pilersaarulli piviusunngortinneqanngilaq, maannalu Naalakkersuisunit pisassiissutit aalajangerneqartarneranni malunnartumik allannguisoqarnikuunngilaq.
Sinerissap qanittuani 2023-mi qaleralittassiissutit: (siunnersuinerit ungaluutillit)
- Upernavik: 9.300 tons (6.070 tons)
- Uummannaq: 9.650 tons (5.153 tons)
- Qeqertarsuup Tunua: 9.100 tons (5.215 tons)