Naalakkersuisut: - Angerlarsimaffimmi nakuuserfigineqartartut amerlavallaarput
Qimarnguiit amerlanerusut aamma imigassamik aalakoornartumik atuinerup annikillisinneqarnissaa, nakuusertarnermik annikillisitsiniarluni Naalakkersuisut iliuuseriniagaasa ilagaat.
Nunatsinni nakuuserneq aamma angerlarsimaffimmi eqqissiviilliorneq pillugit nalunaaruteqartarnerit amerlasoorujussuupput, angerlarsimaffimmilu nakuusertoqartarnera pingaartumik meeqqanut eqquisarpoq. Misissuinermi ilaatigut paasineqarpoq meeqqat angerlarsimaffimmi nakuuserfigineqarnermik nalaatallit amerlanertigut imminut ajoqusernissamik imminullu toqunnissamut eqqarsaateqarnermik ajornartorsiuteqartut.
Naalakkersuisut iliuusissatut pilersaarutaanni, sapaatip-akunnerani matumani saqqummiunneqartumi, qanigisariinni nakuusertarnerup akiorneqarneranut iluaqutaasussami tamanna atuarneqarsinnaavoq.
- Nakuusertarneq tamanit susassarineqarpoq, taamaammat inuiaqatigiittut meeqqatta inuusuttortattalu ilaqutariinni nakuuserfiunngitsumik atornerluinertaqanngitsumillu peroriartornissaat akisussaaffigaarput, Meeqqanut, Inuusuttunut Ilaqutariinnut Naalakkersuisoq, Aqqaluaq B. Egede (IA), saqqummiussinermut atatillugu taama oqaaseqaateqarpoq.
Imigassaq ukkatarineqartoq
Pilersaarummi ilaatigut imigassaq aalakoornartortalik ukkatarineqarpoq, meeqqat inuusuttullu angerlarsimaffimmi imigassamik aalakoornartortalimmik ajornartorsiuteqarfiusumiittut inuusuttunut meeraatilluni angerlarsimaffimmi imigassamik aalakoornartortalimmik nalaataqarsimanngitsunut sanilliullugit angerlarsimaffimmi nakuusernermik atugaqarlutik misigisaqartarnissaat 25-riaammik navianaateqarnerusoq misissuinerit takutippaat.
Tamatuma saniatigut meeraanermi kinguaassiutitigut atornerlunneqarnissaq ulorianarnerulertarpoq. Inunnut imigassamik aalakoornartortalimmik ajornartorsiutilinnut taakkualu qanigisaannut katsorsartinnissamut periarfissat pitsaasut sunniuteqarsinnaasullu qulakkeerniarlugit suliniutit ineriartortinnissaannut ingerlannissaannullu aningaasanik amerlanernik immikkoortitsisoqassaaq.
Aammattaaq Naalakkersuisut suliffeqarfiutillillu imigassamik aalakoornartortalimmik tuniniaasartut suleqatigiinnissamik oqaloqatigiinnermillu qaninnerusumik aallartitsisimapput, tassani nunarput tamakkerlugu imigassamik aalakoornartortalimmik atuinerup annikinnerulernissaa sinertarineqassaaq.
Qimarnguiit amerlanerit pilersinneqassapput
Angerlarsimaffimmi nakuuserneq annertusiartortillugu eqqugaasunut qimarnguinnut periarfissat pitsaanerussapput. Taamaattumillu qimarnguiit patajaallisarneqarnissaat amerlanerillu pilersinneqarnissaat Naalakkersuisut kissaatigaat.
Ullumikkut nunatsinni qimarnguiit katillugit qulingiluaapput, taakkunanngali nakuuserfigitinnermik eqqugaasunut katsorsaanissamik neqeroortarput. Qimarnguiit aaqqissuussaanerannut inatsit Naalakkersuisut allanngortinniarpaat, ilaqutariinnullu sullissivinnut kattunniarlugit, suleqatigiinneq patajaallisarniarlugu.
Ataatsimut isigalugu nakuusernermit eqqugaasunut siunnersuinermik pitsaanerusumik qulakkeerinnittoqassaaq:
- Nakuuserfigineqarsimasunut neqeroorutit assigiissarneqarnissaat qulakkeerneqassaaq. Ikiuinermi tapersersuinermilu kommuni sorleq najugaqarfiginerit imaluunniit inoqarfik sorleq najugaqarfiginerit apeqqutaassanngilaq. Najugaqartitsisarnermut neqeroorutit nakorsiartitsisarnermullu neqeroorutit ineriartortinneqassapput, Naalakkersuisut iliuusissatut pilersaarummi allapput.
Pilersaarut sisamanik immikkoortortaqarpoq:
- Nakuusertarnerit imigassamut aalakoornartortalimmut attuumassutillit ikilisinneqassapput
- Qimarnguiit patajaallisarneqassapput amerlanerillu pilersinneqassapput
- Angerlarsimaffimmi nakuusertarneq unitsinneqassaaq, nakuusernermik eqqugaasunut nakuusersimasunullu pitsaanerusumik katsorsaanerit
- Qanigisaasuni nakuusertarneq pillugu ilisimasaqarneq annertusarneqassaaq, meeqqat inuusuttullu akornanni pinaveersaartitsineq immikkut ukkatarineqarluni
Suliassaqarfimmi ineriartorneq malinnaaffiginiarlugu Naalakkersuisut ukiumoortumik killiffiit pillugit allagaqartassapput.