Naalakkersuisut avannaanut
Naalakkersuisunut ilaasortat sisamat tallimanngorpat sinerissami angalaassapput innuttaasunik ataatsimiisitsiniarlutik, sumukarniarnersut takuuk
Naalakkersuisut siulittaasuat Kuupik Kleist,aalisarnermut, piniarnermut nunanerilermullu naalakkersuisoq Ane Hansen, aningaasaqarnermut naalakkersuisoq Maliina Abelsen inuutissarsiornermullu aatsitassanullu naalakkersuisoq Ove Karl Berthelsen tallimanngorpat Sisimiuni innuttaasunik ataatsimiisitseqqaassapput.
Arfininngornermi Aasiannut ingerlaqqissapput sapaatiuppat ualikkut innuttaasunik ataatsimiititsissallutik. Marlunngornermi marsip 13-ani Ilulissani innuttaasunik ataatsimiititsisoqassaaq.
Uummanniarlutik ingerlaqqissapput tassani innuttaasut ataatsimiitinneqassallutik marsip 15-ani. Kingornatigut angalaqatigiit nunaqarfiit Ukkusissat, Maarmorilik, Ikerasak, Saattut Qaarsullu tikeraarfigissavaat marsip 19-ani 2012 Nuummut utilersinnatik.
- Sumiiffinni radiot allagarsiinerillu atorlugit qaqugukkut innuttaasunik ataatsimiititsisoqartassanersoq nalunaarutigineqartarumaarpoq, namminersorlutik oqartussat nalunaarput.
Tallimanngornermiit marsip 9-aniit www.nanoq.gl takuneqarsinnaalissaaq Sisimiuni, Aasianni, Ilulissani Uummannamilu nunaqarfiinilu qaqugukkut innuttaasunik ataatsimiititsisoqartassanersoq.