Naalakkersuisut Branding Greenland eqqissisippaat
Per Berthelsenip naalakkersuisooqataasalu Kalaallit Nunaata nittarsaanneqarnissaanut aningaasat immikkoortikkusulerpaat.
Tamanna aningaasaqarnermut naalakkersuisup Per Berthelsenip ataasinngormat naalakkersuisut aappaagumut aningaasaqarnermut inatsisissatut siunersuutaat nutartigaq saqqummiummagu erserpoq. »Branding Greenland«-imut aningaasaliissutissat peernagit taarsiullugu 2,1 millioner koruunit tassunga atorfissaqartinneqartut ilanngunneqarsimapput. Taamaaliornikkut saniatigut iluanaarutissaqarpoq, Per Berthelsen tunngavilersuivoq.
– Misissuataarsimavarput, takusinnaallugulu tamanna saniatigut ukiumut 70-80 millioner koruuninik isertitsissutaasinnaasoq, tassa Kalaallit Nunaat pillugu tusaqqusaarutinik takoqqusaarutinillu pilersitsinikkut. Taamaattumik nammineerlunga naalakkersuisut oqaloqatigisimavakka »Branding Greenland«-ip ingerlaannarsinnaanissaanut aningaasatigut toqqammavissaanik pilersitsiniarlunga, Per Berthelsen oqarpoq.
Naalakkersuisut taamaalillutik Inuit Ataqatigiit isornartorsiuinerat tusaaniarsimavaat, taakku KNRikkut erseqqissarmassuk Kalaallit Nunaat nunarsuarmioqatigiinni tusaaneqassappat nittarsaassivimmik nukittuumik peqarnissaq pingaaruteqartoq.
Per Berthelsenip erseqqissarpaa »Branding Greenland« Namminersornerullutik Oqartussat suliffeqafiutaat katillutik ukiumut 1,5 millioner koruuninik tapiissuteqartartussat suleqatigalugit pilersinneqartoq.