Naalakkersuisut "eqqugaasunut pigaartussanik" pilersitsiniartut

Naalakkersuisut inatsisit atuutsitsineqarnerannut susassaqarfimmi ukiuni aggersuni suut salliutinneqassanersut pillugit pilersaarusiorsimapput.

Naalakkersuisut inatsisit atuutsinneqarnerannut susassaqarfimmut atatillugu anguniagaqarnerminni eqqugaasimasut innuttaasullu inatsisitigut naapertuilluartoqarneranik misigisimanerunissaat eqqarsaatigalugit atugassarititaasunik pitsaanerulersitsiniarsariniarput.

- Inuinnaat naalakkersueqataanerat piviusoq inatsisit atuutsinneqarnerannut suliassaqarfimmik aaqqissuulluagaasumik ilisarnaateqarpoq, tassani pisuutinneqartut kisimik eqqartuunneqartarlutik, aamma pinerluuteqarnernik eqqugaasut ataqqinassuseqalerseqqinneqarsinnaasarlutik, Inatsisinik Atuutsitsinermut Naalakkersuisoq Naaja Nathanielsen nalunaarusiaq pillugu allappoq.

Eqqugaasunut pigaartut ikiuuttassasut

Nalunaarusiami suliniuteqarnissamut siunnersuutit tigussaasut arlallit saqqummiunneqarput.

- Eqqugaasunut pigaartut pilersinneqarnerisigut, toqqammavigisassatut illersuisunik atorfinitsitsinikkut kiisalu qanigisariinni nakuusertoqartillugu aamma pinngitsaaliisoqartillugu suliani immikkut ilisimasalinnik suleqatigiissitaliornikkut tamanna ilaatigut pissaaq. Inissiisarfinni paarsisutut ilinniartitaanerup patajaallisaavigineqarnissaa, kommunefogedit amerlineqarnissaat kiisalu qarasaasianut systemit isumannaatsut, ingerlatsinermi isumannaatsuusut ullutsinnullu naleqquttut taamatuttaaq Naalakkersuisut kissaatigaat.

Eqqugaasunut pigaartup innuttaasut ajornartorsiutitik pillugit ikiortissarsiorfigisinnaasaannut siunnersortiffigisinnaasaannulluunniit innersuuttassavaat. Naalakkersuisut Danmarkimilu inatsisinik atuutsitsinermut ministeeriaqarfik nunami eqqugaasunut pigaartunik pilersitsinissamut akisussaasuupput.

Naalakkersuisut eqqugaasimasunut pigaartunik pilersitsinissap saniatigut aamma misissorniarpaat aningaasaateqarfiliorsinnaanermut periarfissaqarnersoq.Pinerlunnernit angallannernilu ajutoornermik eqqugaasunut Danmarkimi eqqusaasunut aningaasaateqarfeqarpoq, aningaasaateqarfiullu pinerlunnernit angallannernilu ajutoornernit eqqugaasut ikiorneqarnissaat siunertaraa. Tamanna suliniutinut sammisanullu tapiissuteqarnikkut pisarpoq, taakkulu pinerlunnernit angallannernilu ajutoornernit eqqugaasut pillugit ilisimasat imaluunniit tapersersuinermik suliniuteqarneq pingaarnertut patajaallisitsissapput.

Illersuisut eqqunngitsuliorfigineqartunullu ikiuuttartussat amerlanerusut

Naalakkersuisut toqqammavigisassatut illersuisunik inuttassarsiuinerup annertunerusumik ukkatarineqarniarpaat, illersuisut politiit killisiuineranni najuullutillu eqqartuussivimmi eqqugaasimasumik peqateqartassapput. Danmarkimi inatsisinik atuutsitsinermut ministeeriaqarfiup tamakkiisumik tamanna akisussaaffigaa, Kalaallit Nunaanni eqqunngitsuliorfigineqarsimasunut ikiuuttartoqanngimmat. Illersuisut amerlassusaat naammanngillat, Naalakkersuisullu isumaqarput, tamanna immikkut aningaasaliissuteqarnikkut aaqqiiffigineqarsinnaasoq.

- Eqqunngitsuliorfigineqartumut eqqartuussissuserisussanngortitsisarnermik aaqqissuussinermik eqqussinissap tulleriiaarinermi pingaartinneqarnissaa Naalakkersuisut kissaatigaat. Eqqunngitsuliorfigineqartumut ikiuuttussatut eqqartuussissuserisussanngortitap pinerlineqartumut toqqammavigisassatut illersuisup suliassai amerlasuut assingi suliarisarpai, kisianni aamma inatsisilerinermut tunngasunik suliassaqarlunilu pisinnaatitaalluni. Eqqunngitsuliorfigineqartumut eqqartuussissuserisussanngortitsisarnermik aaqqissuussinermik eqqussinissaq pillugu apeqqut Kalaallit Nunaanni Eqqartuussiveqarneq pillugu Siunnersuisoqatigiinni oqallisigineqarsimavoq, Naalakkersuisut nalunaarusiami allapput.

Innuttaasut tusarniaaffigineqassasut

Naaja Nathanielsen nunami maani eqqartuussiveqarnerup siunissaa oqaluuseriniarlugu innuttaasunik tusarniaaniarpoq.

- Pingaarutillit ilaasut aamma tassaapput pitsaaliuineq kingumullu innuttaasutut inooqataasinnaalersitseqqinneq, tassami pinerluuteqarnerit pinnginnissaat pitsaanerpaajummat. Eqqartuussiveqarnitsinni tunngaviusumik tunngavigisatta ukiuni tulliuttuni innuttaasut, oqartussaasut, suliniaqatigiiffiillu peqatigalugit oqaloqatigiissutiginissaat qilanaaraara, Naaja Nathanielsen oqarpoq.

Naalakkersuisut anguniagaqarput arlalinnik salliutinniakkaminnik. Naalakkersuisunit aamma kissaatigineqarpoq, pinerluutaasimasumik nalunaaruteqarnissamut periarfissat pillugit paasissutissiisoqarnerusassasoq kiisalu qanigisat persuttaasimaneranni pinngitsaaliillutillu atoqateqarsimanerannik suliani suleqatigiittussanik immikkut ilisimasalinnik pilersitsisoqarnissaa.

Naalakkersuisut anguniagaat salliutinniagaallu atuarneqarsinnaapput, uani.