Naalakkersuisut imarpik qulaallugu timmisartuussinernut nutaamik isumaqatigiissuteqangajalersut
Danmarkimut aalajangersimasumik timmisartuussisarnissaq pillugu Air Greenlandimik isumaqatigiissut sapaatip akunnerata tulliani pisariissaaq, Naalakkersuisut ilisimatitisipput.
Kalaallit Nunaata ammariartornera ilutigalugu Danmarkimut timmisartukkut aalajangersimasumik attaveqartarnissaq pisariaqartinneqartussaavoq.
Tassungalu atatillugu Naalakkersuisut Air Greenlandimik isumaqatigiissusiorlutik suliaqarput.
- Kalaallit Nunaanni ammaassiartorneq pillugu suliniuteqarnermi maannarpiaq Namminersorlutik Oqartussat isumaqatigiissut, Kastrupip Mittarfiata aamma Kangerlussuup akornanni Imarpik qulaallugu timmisartuussinerit akuttoqatigiilernissaannik qulakkeeriffiusussaq sularileruttorpaat, Naalakkersuisut tusagassiorfinnut nalunaaruteqarnermi allapput.
Ineqarnermut Attaveqaqatigiinnermullu Naalakkersuisoqarfimmit naatsorsuutigineqarpoq, Air Greenlandimik isumaqatigiissut sapaatip akunnerata tulliata aallartinnerani pisareersimassasoq.
Aalajangersimasumik ingerlaartarfeqarnissamik qulakkeerinninniartoq
- Kalaallit Nunaata Danmarkimiit tikittartunut ammaassiartornera ilutigalugu Kalaallit Nunaannut timmisartumi inissat piumaneqarneri annertusisussaapput. Kisiannili ilaasussat aasaanerani ilaasartunit nalinginnaasunit ikinnerungaatsiassapput, Ataaveqaqatigiinnermut Naalakkersuisoq Karl Frederik Danielsen oqapoq, nangillunilu:
- Taamaattumik Danmarkip aamma Kalaallit Nunaata akornanni angallavimmik aalajangersimasumik, innuttaasunit akuersaarneqarsinnaasumik akuttussussilimmik timmisartuussiviusartumik (sapaatit akunnerannut timmisartuussinerit aalajangersimasumik amerlassusillit), tamatumalu peqatigisaanik Air Greenlandimit aningaasaqarnikkut nammanneqarsinnaasumik qulakkeerinissaq pingaaruteqarpoq.
Naalakkersuisutnit ilisimatitsissutigineqarpoq, sapaatit akunnerata tulliuta aallartinnerani Air Greenlandimut isumaqatigiissutissap nutaap piareersimanissaa naatsorsuutigineqartoq.