Naalakkersuisut innaallagiaq pillugu suliami millionit arlallit naligannut ajorsartinneqartut
Naalakkersuisut aqqusinermi qaammaqquteqarnermut aningaasaliissutit 3 millioner koruuninik ilanngaaffigineqarnerisigut aamma Namminersorlutik Oqartussat suliffeqarfiutaata KNI-p immikkut 4,5 millioner koruuninik akiliuteqartinneqarneratigut, Nukissiorfinnut aningaasaliissutit qaffaaffiginiarlugit Aningaasaqarnermut Ataatsimiititaliaq akuersitinniaraluaramikku iluatsinngitsoorpaat
Ukiortaami qummoroortartut kingulliit qummoroortinneqarnerat qaangiussimatsiaannartoq Naalakkersuisut Aningaasaqarnermut Ataatsimiititaliamut qinnutigaat, Nukissiorfinnut aningaasaliissutit allanngortinneqarnissaat, ukioq 2020 tamakkerlugu innaallagissamut imermullu akigititat allanngortinneqannginnissaat anguniarlugu.
Ataatsimiititaliap januaarip arfineq-pingajuanni ataatsimiinneranit imaqarniliami takuneqarsinnaavoq, Aningaasaqarnermut Ataatsimiititaliami ilaasortat Naalakkersuisut nukissiuuteqarnermut politikkiannut isumaqataanngitsut.
Uulia akikitsoq
Uuliamut akigititat maannakkorpiaq appasipput, tamatumalu malitsigisaanik innuttaasut kiassarnermut akit, uuliap akia kiisalu kissarsuutit uuliamik atuinerminnut sanilliullugu akikinnerunerata iluaqutaasinnaanera takusinnaavaat.
- Qanoq kiassarnermut akigitinneqartup uuliap akiata kingullertigut ineriartorneranit sunnerneqarsimanera ataatsimiititaliamit paasiumaneqarpoq. Qanoq uulia atorlugu kiassarnerup allamik atuilluni kiassarnermit akikinnerutiginera ataatsimiititaliamit paasiumaneqarpoq, Aningaasaqarnermut Ataatsimiititaliap ataatsimiissimaneranit imaqarnialiami allassimavoq.
Nukissiorfiit avoqqaarineqartut
Aningaasaqarnermut Ataatsimiititaliami ilaasortat nukissiuutileqatigiiffimmut aamma avoqqaarinnipput.
- Atuisut akornanni akikinnerusumik kiassarsinnaanermik ilisimasaqaleriartorneq ataatsimiititaliamit ineriartornertut pitsaasutut isigineqarpoq. Taamaammat ataatsimiititaliaq isumaqarpoq Nukissiorfiit pilersuisussaatitaanerminnik attassiinnarnissaminnik aallussisariaqartut, tamatumunngalu aningaasartuutissanut aningaasaliissutit, unammillertinik nukillaarsaatinut imaluunniit atuisut nammineerlutik akikinnerusumik kiassarsinnaanerannik akiuiniarnermut atorneqaratik, tamatumunnga atorneqartariaqartut, imaqarniliami allassimavoq.
Aningaasaqarnermut Ataatsimiititaliami maluginiarneqarpoq, kommunit aqqusinermi qaammaqquteqarnermut akiliutigisartakkaminnik, ullumikkut pingajorarterutaanik akiliutigisartakkaminik annikilliliissanersut erseqqissumik oqaatigineqarsimanngitsoq.
- Tamatuma saniatigut ataatsimiititaliaq isumaqarpoq ingerlatseqatigiiffinnit Namminersorlutik Oqartussanit pigineqartunit, soorlu pisumi matumani KNI-mit iluanaarutinik immikkut ittunik aallertoqassanngitsoq, Naalakkersuisunut itigartitsissummi allassimavoq.