Naalakkersuisut: Innuttaasut NemKontoqassapput
Aappagumiit innuttaasut suliffeqarfiillu tamarmik NemKontoqalersinneqarnissaat anguniarlugu aaqqissuussisoqassaaq, pisortat taamaalillutik assersuutigalugu akileraarutissatigut utertoorutissanik akiliuteqarsinnaanngorlugit. Naalakkersuisunit tamanna siunnersuutigineqarpoq.
Innuttaasut suliffeqarfiillu NemKontoqartuuppata pisortat allaffissornermi aningaasanik sipaaruteqarsinnaanngussapput.
Innuttaasut aamma taamaalillutik oqartussanut arlalinnut konto normuminnik ilisimatitsisariaqartarunnaassapput.
Taakku inatsisissatut siunnersuuteqarnermut tunngavilersuutit ilagaat, siunnersuut Naalakkersuisut ukiakkut ataatsimiinnissamut ilanngutsissimavaat.
Siunnersuummi pineqarpoq, innuttaasut 18-ileereersimasut tamarmik suliffeqarfiillu tamarmik NemKontoqarnissaat, innuttaasoq suliffeqarfilluunniit kontomik allamik ilisimatitsissuteqasimanngippata, pisortat kontomut aningaasanik ikisisinnaalissallutik.
Konto pisortanit pilersinneqarsinnasoq
Innuttaasut ataasiakkaat NemKontutik nammineq toqqassavaat. Innuttaasut NemKontunik toqqaasimanngitsut kingusinnerusukkut Namminersorlutik Oqartussanit attavigineqassapput.
Siunnersuut naapertorlugu, innuttaasut aningaaserivimmi ullumikkut kontoqanngitsut eqqarsaatigineqassapput. Tassa NemKonto Namminersorlutik Oqartussanit imaluunniit kommunimit pilersinneqarlunilu pigineqassaaaq, kisiannili inuk pineqartoq tassanngaanniit tigusisinnaatitaalluni:
- Innuttaasoq qaqugukkulluunniit nammineq NemKontomik nalunaaruteqarnissaminut iliuuseqarsinnaavoq, siunnersuummi allassimavoq.
Danskit aaqqissuussaat tunngavigineqartoq
IT-mik ineriartortitsinermi aaqqissuussamillu aqutsinermi aallaqqaataanit aallartittoqannginnissaa anguniarlugu, siunnersuut NemKonto pillugu danskit inatsisaannik tunngveqarpoq. Aaqqissuussaq Danmarkimi 2003-mi atuutsinneqalersimavoq.
-Taamaasilluni sulissutigineqarpoq Kalaallit Nunaanni oqartussaasut Danmarkimi NemKontomik aaqqiissummut ilanngunnissaat, siunnersuummi allassimavoq.
NemKontomut nalunaarsuut 2021-p ingerlanerani piareerneqarsimassasoq naatsorsuutigineqarpoq, en million koruunillu missaani akeqassangatinneqarluni. Tamatuma kingorna ingerlanneqarnera ukiumut 200.000 koruuninik akeqartassasoq nalilerneqarpoq.