Naalakkersuisut meeqqanut tapiissutit qaffanniaraat
Ilaqutariit appasinnerusumik isertitaqartut assigiiaarnerusumik meeqqanut tapiissuteqarfigineqartalernissaat pillugu, Naalakkersuisut inatsimmut allannguutissatut siunnersuutaat maanna tusarniaaffigineqaleruttorpoq.
Ilaqutariit isertitakinnerusut aningaasaqarnikkut ikiorsiniarlugit, Naalakkersuisut inatsimmut allannguutissatut siunnersuuteqarput. Meeqqanut tapit, tapillu allat angajoqqaajusunut tunniunneqartartut ataatsimoortilernissaat, isertitallu suuneri apeqqutaatinnagit tunniunneqartalernissaat Naalakkersuisut maanna sulissutigaat.
- 136.000 kr.-nit ataallugit maannakkorpiaq isertitaqartut ilaqutariit tamarmik, isertitaminnik qanoq pissarsisimanerat apeqqutaatinnagu, meeqqanut tapiissutinik “qaffasinnerusunik” pinissamut pisinnaatitaalernissaannik qulakkeerisussamik aaqqissuussinermik nutaamik sananissaq siunnersuummik pingaarnertut siunertaavoq, nassuiaammi allassimavoq.
Siunnersuut nunatta karsianit ukiumut 7,9 milliuunit koruuninik aningaasartuutaassaaq.
Tapiissutit assigiinngitsut nuunneqassapput
- Ullumikkut – meeqqanut tapiissutit nalinginnaasut saniatigut – soorlu utoqqalinersiat pillugit, siusinaartumik pensionisiat pillugit, atuartunut tapiisarneq pillugu aammalu ilinniartuunersiutit pillugit inatsisini aaqqissuussinerniit, meeqqanut tapinik assigiinngitsunik arlalinnik tunniussisoqartarpoq.
- Tamanna, ilaqutariit akissaatikinnerit ilaasa, ilaqutariinnut akissaatikinnernut allanut naleqqiullugit minitaasalersimanerannik nassataqarsimavoq, tusarniummi paasissutissani UANI atuarsinnaasarni allassimavoq.
Inatsimmut allannguutissatut siunnersuummi tapit assigiinngitsut meeqqanullu tapit ataatsimoortilerneqassapput, inatsisiniillu allanit peerneqarlutik. Angajoqqaat isertitakinnerusut assigiimmik tapeqalerpata, siusinaartumik soraarnerusutisiaqartut, soraarnerusutisiaqartut ilinniartullu ilaat meeqqat tapiinik annikitsumik appaavigineqaratarsinnaasut allassimavoq.
Assigiinngisitsineq annikillisarneqartoq
Inatsimmut allannguutissatut siunnersuutip qulakkiissavaa isertitat aallaavigalugit assigiimmik tapeqartitsilernissaq, isertitat qanoq isertitarineqarneri apeqqutaatinnagit.
- Taamaattumik matuminnga allannguutissatut siunnersuummik, isertitaminnik qanoq pissarsisimanerat apeqqutaatinnagu, tigusisussap maannakkorpiaq isertitai taamaallaat tunngavigalugit meeqqanut tapiissutinik kattutami nutaami meeqqanut ilassutit tapinik aaqqissuussanik pineqartunik tamanik katiterisumik aaqqissuussamik nutaamik atuutilersitsisoqassaaq, allannguutissatut siunnersuutip nassuiaataani allassimavoq.
Isertitat akissarsiaagaluarpata, soraarnerussutisiaagaluarpata, ilinniarnermusiaagaluarpataluunniit, meeqqanut tapit taamaasillutik assigiissarniarneqarput.
Inatsimmut allannguutissamut siunnersuutip nassuiaataani naatsorsuinermi meeqqanut tapisiaqartut 3.591-it ilanngunneqarsimapput.
Danmarkimi ilinniartut ilaat periarfissaqalissapput
Allannguutissatut siunnersuummi kalaallit meerartaqarlutik Danmarkimi ilinniaqqittut tapisiaqarnissaat aamma ammatinneqassaaq. Danmarkimili ilinniartut amerlagisassaanngitsut inatsit tusarniutigineqartoq malillugu tapisiaqartinneqarsinnaasassammata, taakkununnga aningaasartuutissat ukiumut 100.000 koruuniunissaat missingiunneqarpoq.
Naalakkersuisut naatsorsuutigaat allannguutissatut siunnersuut 2023-imi atuutilerpat ukiumut 7,9 milliuunit koruuninik naleqassasoq.
Siunnersuut augustip qulingani 2022 tungaanut tusarniutigineqarpoq.