Naalakkersuisut Nunavumut millionip affaanik ikiorsiissuteqarput
Naalakkersuisut siunnersuuteqarnerisigut Iqalunni pisumut atatillugu inunnut ikiorsiissutitut 500.000 koruuninik ilassutitut aningaasaliissutit Inatsisartut Aningaasaqarnermut Akileraartarnermullu Ataatsimiititaliaannit akuersissutigineqarput.
Iqalunni niuertarfissuarmi Northmartimi alianartumik kingunilimmik ikuallattoqarpoq. Pingaartumik quersuaq niuertarfissuup eqqannguaniittoq ikuallannermit eqqorneqarpoq novembarip arfineq pingajuani.
Taamaalillunilu illoqarfiup ukiuunerani peqqumaatissaasa ilarpassui annaaneqarput aammalu Iqalunni najugalinnut ulluinnarni nioqqutissanik allanillu pilersuinissaq ajornartorsiutaalerpoq.
Ikuallattoqarneranik nutaarsiassap tusarnerata kingunitsianngua Naalakkersuisut Nunavumi naalakkersuisunut saaffiginnipput, Kalaallit Nunaat pisup kingorna qanoq ikiuussinnaallunilu ikorfartuisinnaanersoq paasiniarlugu, Namminersorlutik Oqartussat tusagassiutinut nalunaarummi allappoq.
Inunnut ikiorsiissutit
- Naalakkersuisut siunnersuuteqarnerisigut Iqalunni pisumut atatillugu inunnut ikiorsiissutitut 500.000 kr.-inik ilassutitut aningaasaliissutit Inatsisartut Aningaasaqarnermut Akileraartarnermullu Ataatsimiititaliaannit akuersissutigineqarput, ilisimatitsissutigineqarpoq.
- Nunavumi naggueqatigut taama ajornartoortillugit ikiuussinnaanerput assut nuannaarutigaara. Karrat Kangerluanni 2017-imi juunimi ajunaarnersuaqarnerani Nunavumit ikiorserneqarpugut – Nunavumut aningaasanik tapiissuteqarnitsigut maanna akiniaanerput pissusissamisoorpoq, aningaasaqarnermut naalakkersuisoq Vittus Qujaukitsoq tusagassiutinut nalunaarummi oqarpoq.
Ikiorsiissutit Government of Nunavumut tunniunneqassasut nalunaarutigineqarpoq.