Qaanaaq
Naalakkersuisut Qaanaami innuttaasunik ataatsimeersuartitsissapput
Qaanaami innuttaasut maanna inuussutissarsiornermi suliffeqarnermilu unammilligassat oqaluuseriniarlugit ataatsimiigiarnissamut qaaqquneqarput, aammalu Citronen Fjordimi piiaaffimmik suliniut pillugu
Naalakkersuisut siulittaasuat, Naalakkersuisunut ilaasortat arfinillit Qaasuitsullu Kommunia Qaanaami eqqaanilu innuttaasunik Timersortarfimmut pingasunngornermi januaarip 20-ni ataatsimiigiaqqusipput, Qaanaami eqqaanilu inuussutissarsiornermi suliffeqarnermilu unammilligassat oqaluuseriniarlugit qaaqqusisuupput.
- Naalakkersuisut taamak amerlatigalutik Qaanaami innuttaasut inuussutissarsiornermik ineriartortitsineq, ilinniartitaaneq, ineqarneq, attaveqaqatigiinneq, avatangiisit, aalisarneq piniarnerlu pillugit isumaat tusariartorlugit ornigussinnaagamik Naalakkersuisut iluarisimaarpaat, Namminersorlutik Oqartussat tusagassiuutinut nalunaarummi ilisimatitsipput.
Naalakkersuisut erseqqissarpaat, Qaasuitsup Kommunia suleqatigalugu naalakkersuisoqarfinni suliassaqarfiit akimorlugit ataatsimoortumik sumiiffimmi pisariaqartinneqaqisunik aaqqiissutissarsiornissaq Naalakkersuisut pisariaqartikkaat.
Ironbarkip suliniutaa
Citronen Fjordimi aatsitassarsiornissamut suliniut pillugu immikkut aamma tusagaqartoqarsinnaassaaq, Naalakkersuisut, Naalakkersuisut siunnersortaat aatsitassarsiorfiullu aallartitaat apeqquteqarfigineqarsinnaassallutik.
Ulloq 20. januaari innuttaasunik ataatsimiititsineq inuussutissarsiorneq sulisoqarnerlu pillugu ulloq 21. januaari isumasioqatigiinnissamut tunngaviussaaq, isumasioqatigiinnermi sulisoqarnermik inuussutissarsiornermillu suliaqartut peqataassallutik.
Namminersorlutik Oqartussat ilisimatitsissutigaat, nunap immikkoortuani unammilligassat iliuuseqarfigineqarnissaannut eqqartuisoqassasoq. Aallartisaaneq, takornariaqarneq, sulisoqarneq, ilinniartitaaneq, aalisarneq, piniarneq, attaveqaqatigiinneq pilersuinerlu immikkut sammineqassallutik.
Aamma atuaruk: Ironbark sakkortuumik isornartorsiorneqartoq