Naalakkersuisut: Ukiuunerani umimmanniarneq sivitsorneqarpoq
Aalisarnermut Piniarnermullu Naalakkersuisoq, Kim Kielsen, Qeqqata Kommuniani borgmesterip ataatsimiititaliamilu siulittaasup kissaataat malillugu ukiuunerani umimmanniarneq sivitsorpaa.
Qeqqata Kommuniani piniartut ullumikkumiit ukiuunerani umimmanniarsinnaanngorput.
Qeqqata Kommuniani borgmesterip Malik Berthelsenip (S) kommunimilu piniarnermut ataatsimiititaliami siulittaasup Aqqalu Skiftep (S) ulluni qulini piniarsinnaaneq, Aalisarnermut Piniarnermullu Naalakkersuisoqarfiup aallaqqaammut nalunaarutigisaa, isornartorsiorpaat.
Isornartorsiunerli mumippoq, Aalisarnermut Piniarnermullu Naalakkersuisup Kim Kielsenip (S) ukiukkut umimmanniarnissaq ullunik arfineq-marlunnik sivitsorpaa.
- Kangerlussuup eqqaani ukiuunerani 2024-mi umimmanniarnermut atatillugu Aalisarnermut Piniarnermullu Naalakkersuisoqarfimmiit matumuuna nalunaarutigissavarput ukiuunerani umimmanniarneq 3. marts ilanngullugu ingerlasussaanngormat.
Ulluni marlunni periarfissinneqarneq sivikippallaartoq
Kim Kielsenip piniartut februaarip ulluisa 13-anni nalunaarfigai februaarip ulluisa 15-anni ukiuunerani umimmanniarsinnaalersut. Tassani ullut marluk sioqqullugit nalunaarfigineqarlutik. Piniartut tassani ulluni qulini umimmanniarnissaminnut periarfissinneqarput, Qeqqata Kommuniani isornartinneqartumik.
Borgmesteri siulittaasorlu Naalakkersuisunit tusaaneqarput, ukiuuneranilu umimmanniarnissaq sivitsorneqarpoq.