Najaaraq allagartartaartut nalliuttorsiutigineqarneranni KNI-mit akissarsitinneqartoq
Sapaatip-akunnerani matumani Ilisimatusarfimmi allagartartaartitsisoqarpoq. Bachelorinngortut amerleriangaatsiarput
![Najaaraq Olsen bachelorinngortuni angusarissaarnerpaatut KNI-mit akissarsitinneqartoq.](https://image.sermitsiaq.ag/470703.webp?imageId=470703&width=960&height=642&format=jpg)
Ilisimatusarfimmi tallimanngormat allagartartaartitsisoqarmat kalaallisuulippassuit najuupput qullilisorpassuullutillu.
Bachelorinngortut kandidatinngortullu ukiumi sulingaatsiareersimallutik soraarummeersimanerminnut uppernarsaatitik tiguaat.
Ilisimatusarfimmit ilisimatitsissutigineqarpoq, bachelorinngortut 69-iusut, siornamut sanilliullugu 20-nik amerlanerullutik. Ukioq manna kanditatinngortut sisamaapput.
Bachelorinngortut misissuataaraanni takuneqarsinnaavoq, inatsisilerinermi ilinniartitaanerup nutaajukannersup iluani ilinniagaqartartut amerliartupiloorsimasut. 2021-mi inatsisilerinermi bacheloringortut siulliit pingasuusimapput, ukioq-mannalu arfineq-marluullutik. Allagartartaartunit ileqquusutut ilinniartitsisunngortut amerlanerpaapput - ukioq manna 34-t allagartartaaramik.
Arfineq-marluk peqqissaasutut ilinniakkaminnik naammassipput - peqqissaasut amigaatigineqarneqarluartuupput.
Ileqquusoq malillugu bachelorinngortuni kandidatinngortunilu angusaqarluarnerpaat akissarsitinneqarput.
Najaaraq Olsen bachelorinngortuni angusarinnerpaatut KNI-mit akissarsitinneqarpoq, Kista Isaksenilu kandidatinngortuni angusarinnerpaatut Sulisitsisunit akissarsitinneqarluni, Ilisimatusarfik nittartakkamigut ilisimatitsivoq.
![Kista Isaksen angusarissaarnerpaatut Sulisitsisunit akissarsitinneqarpoq. Sulisitsisunit Bent Sørensen akissarsiamik tunniussisuuvoq.](https://image.sermitsiaq.ag/470859.webp?imageId=470859&width=960&height=642&format=jpg)
Ilisimatusarfiup nittartagaani allagartartaartut pillugit assit amerlanerit takuneqarsinnaapput.