Sermersooq
Najugaqartut oqartussaaqataanerisa siuariaateqarsimanera nuannaarutigineqartoq
Inissiaatileqatigiiffik Kommuneqarfik Sermersuumit pigineqartoq Iserit A/S pitsanngoriaataasimasut pillugit naluaaruteqarpoq
Inissiaatileqatigiiffik Iserit A/S ingerlalluarpoq.
Ingerlatseqatigiiffiup siulersuisuisa marsip 24-ani ileqquusumik ataatsimiinneranni inissiaatileqatigiiffiup ingerlanera siulersuisut naammagisimaarlugu paasivaat, najugaqartut oqartussaaqataanerisa ineriartornerata siuariaateqarsimanera, tamatumani immikkoortortani siulersuisut amerlassusaat malunnaatilimmik amerlanerulersinneqarsinnaasimammata.
- Peqatigitillugu nuannersuuvoq, Tasiilami februaarip qaammataani inissiat attartortittakkat nutaat qulit atulersinneqarmata, aammalu suli qulinik sanasoqarnissaa pilersaarutaammat, Iserit A/S-imi siulittaasoq Malene Lynge pisortarlu Torben Kortegaard tusagassiutinut nalunaarummi oqarput.
Nuummi immikkoortup 164-ip (Tuujuk) isaterneqarnerani sulineq pilersaarutit malillugit ingerlalluarpoq, Ceresvejimi inissiat tallimat (E-F-G-H-K) imaarneqarnerat ingerlalluarpoq, allaat najugaqartuusimasut 75 procentii nuutsinneqareersimallutik. Attartortut sinneri qaammatini aggersuni inissarsissuteqqinneqassapput. Inissiat ukiaru isaterneqarnissaat naatsorsuutigineqarpoq, tamatumalu kingornagut inissianik attartortittakkanik nutaanik sananissamut inissaqalissalluni.