Najukkami siunnersuisoqatigiinnit Kujataani sumiginnaaneq akiorniarneqassaaq
Qaqortumi politiit meeqqat silami sinittussanngorlugit imminnut isumagisussanngortinneqartarnerat pitsaaliorniarlugu suliniutaasinnaasunik aallartitsiniarluni najukkami siunnersuisoqatigiinnik ataatsimeeqatigiinnissamut aggersaapput.
Kommune Kujallermi najukkami siunnersuisoqatigiit meeqqanik Nanortalimmi arsaattarfimmi issiaviup ataani sinittunik suliamut maanna akuliutitinneqarput.
- Najukkami siunnersuisoqatigiit ataatsimiinnermut aggersarneqarput, pinaveersaartitsinermi suliniummik ataatsimoorussamik suliaqarsinnaanerput takusinnaaniassagatsigu, taamaalillutalu meeqqanik silami sinittoqaqqinneranik pisoqaqqinnginniassammat. Ilaasortanut saaffiginnereerpunga, taamaattumillu najukkami siunnersuisoqatigiinni oqaloqatigiinneq aallartereerluni, najukkami siunnersuisoqatigiit siulittaasuat Qaqortumilu politikommissæri, Søren A. Hansen, Sermitsiaq.AG-mut oqarpoq.
Najukkami siunnersuisoqatigiit Kalaallit Nunaanni Politiineersunik aamma Kommune Kujallermeersunik sinniisoqarput, pinerlunniartarnerlu annikillisinniarlugu aaqqiissutissanik pinaveersaartitsissutaasunik nassaarniarnermik suliaqartussaallutik. Suliami tigussaasumi najukkami siunnersuisoqatigiit siulittaasuat meeqqat sumiginnarneqarnerminni silami sinittarnerat pinaveersimatinniarlugu suliniuteqartoqarsinnaaneranik ujartuivoq.
Pinerluttuliortoqarsimanngitsoq
Sermitsiaq.AG inummut Kommune Kujallermi isumaginninnermut ingerlatsivimmut meeqqat marluk Nanortalimmi arfininngornerup ullaassaani arsaattarfimmi issiaviup ataani sinittut siumorneqartut pillugit nalunaaruteqarsimasumut attaveqarsimavoq.
Kalaallit Nunaanni Politiit Sermitsiaq.AG-mut paasissutissiipput, politiit pisumi annerusumik iliuuseqarnianngitsut, pisumi pinerluttuliortoqarsimanngimmat.
- Suliami tigussaasumi tassani pinerluttuliortoqarsimanissaa ilimagissallugu tunngavissaqanngilaq, taamaattumik kommuni tassaavoq isumaginninnermi suliamik ingerlatsinissamut piginnaassusilik. Politiit suliamik malittarinninnermut atatillugu kommunimut ikiuussinnaapput, kisianni paasissutissat pigisavut aallaavigalugit, pinerluttuliornermi suliamik aallartitsinissaq pisariaqarsorinngilarput, Kalaallit Nunaanni Politiinit oqaatigineqarpoq.