Nakkutiginninnermi unammisitsinermi ajugaasut toqqarneqarput

Issittumi nakkutiginninneq qanoq pitsanngortinneqarsinnaava? Unammisitsinermi NATO Innovation Challengemi nutaanik isumassarsiullaqqinnerpaat maanna toqqarneqarput. Finlandimiit iligiit Kuva Space Oy ajugaasuusut Issittumi Sakkutooqarfiup tusagassiutinut nalunaarutigaa.

Ajugaasut 35.000 koruuningajannik akissarsitinneqarput (5.000 USD).

- Unammeqataasut qulit aningaasaliisartunut sassartinneqarput isumassarsiaminnillu saqqummiillutik. Naliliisartut Kuva Space Oy NATO-p qallunaallu illersornissaqarnikkut suliaqarnermikkut siunissami iluaqutigisinnaasaanik siunnersuuteqarluarnerpaatut maanna toqqarpai.

- Inuit inuunerat ulorianartorsiortillugu sukkanerpaamik ikiuiartorsinnaanissamik periarfissamik isumassarsiamik saqqummiipput, Issittumi Sakkutooqarfimmi pisortaagallartoq Poul Primdahl oqarpoq.

Issittoq nakkutigalugu

NATO Innovation Challengemi unammisut qulit Nuummi Hotel Hans Egedemi isumassarsiatik naliliisartunut sisamanngornermi juunip 22-ani saqqummiuppaat. Ajugaanniutivinnermi qallunaat iligiiaat pingasut peqataapput, sinneri Finlandimeersut, Tysklandimit, Amerikamit Canadamiillu.

- Suliassiissummut imaaliallaannagassaanngitsumut isumassarsianik taama amerlatigisunik nassiussisoqarnera nuannaarutigaarput. Issittup nakkutigineqarneranut Issittumi Sakkutooqarfiup nunanillu avannarlerneersut NATO-mut ilaasortat sakkutuujunngitsunik suleqateqarnissamik periarfissaat pitsaanerulernissaanut, Poul Primdahl oqarpoq, nangipporlu:
- Kuva Space Oy-ip isumassarsiartik NATO suleqatigalugu ineriartorteqqinnissaanut periarfissaqalerput, ullullu ilaanni taakku isumassarsiaat Kalaallit Nunaanni Savalimmiunilu suliaqarnitsinnut iluaqutaassasoq neriuutigaarput, oqarpoq.

Canadamiut Cellular Robotics 2-nngorput amerikamiut aningaasaataannik 2000 dollarinik akissarsitinneqarlutik. Canadamiut MetOcean Telematics 3-nngorput amerikamiullu aningaasaataannik 1000 dollarinik akissarsitinneqarlutik.