Nakkutilliinermik ingerlatsivik: Video atorlugu nakkutilliineq atorunnaarli
Namminersorlutik Oqartussani Nakkutilliinermik ingerlatsivik Aningaasaateqarfimmut Orpigarmut nakkutilliiartorsimavoq. Ulloq unnuarlu angerlarsimaffimmi pissutsit naammagisimaarnarluinnarput, taamaattoq nakkutilliiartortut sakkortuumik siunnersuutigaat video atorlugu nakkutilliineq atorunnaarsinneqarnissaanik sakkortuumik innersuussivoq.
Namminersorlutik Oqartussat nakkutilliinermik ingerlatsiviat ulloq unnuarlu paaqqinniffimmut, Aningaasaateqarfik Orpigarmut Kangerlussuarmiittumut februarimi 2021-mi nakkutilliiartorluni tikeraarpoq. Aningaasaateqarfik Orpigaq tikeraarneqarnermini meeqqat 10-18-ot akornanni ukiulinnik aqqaneq-marlunnik najugaqarfigineqarpoq.
Nakkutilliinermik ingerlatsivik naapertorlugu nakkutilliineq "eqqissisimasumik ilorrisimaarnartumillu ingerlanneqarpoq". Nakkutilliinerup takutippaa sulisut perorsaanermik ilinniagallit amerlanngitsut.
- Taamaattorli sulisut pisortallu akornanni piginnaasanik ineriartortitsinissaq illugiillunilu isumasioqatigiittarnermik qitiutitsinissaq pisariaqartinneqartoq tamannalu perorsaanikkut tunniunneqarsinnaasunik pitsanngorsaavoq, nakkutilliisut allapput.
Videokkut nakkutilliinerit inassutigineqanngillat
Ulloq unnuarlu paaqqinniffik ingerlalluarmat peqqussutigineqartut amerlanngillat.
Taamaattoq nakkutilliisut peqqussutinut ilannguppaat inuup innarligassaannginneranik innarliisoqannginniassammat najugaqartut videokkut nakkutigineqarnerat annikilleqqullugu. Tamatumunnga tunngavilersuutigineqarpoq Orpigaq matoqqasuunngimmat.
Najugaqartut sillimanissaat
Nakkutilliiartortut maluginiarpaat video atorlugu nakkutilliinermut tunngatillugu 2018-imi peqqussutigineqartoq maanna malinneqartoq. Ulloq unnuarlu paaqqinniffimmi torsuusani taamaallaat videomik nakkutilliisoqarpoq.
Nakkutilliisut ilanngullugu paasivaat sillimaniarneq pillugu najugaqartullu qimaariasaarsinnaanerat, taamaasillutillu imminnut ulorianartorsiortileratarsinnaanerat pinngitsoortinniarlugu nakkutilliissutit atorneqartut.
- Tamassumalli allanngortinngilaa videot atorlugit nakkutilliinerit annikillisinneqartariaqarnerat, nassuiaatigineqarpoq.
Nakkutilliisut ilanngullugu erseqqissarpaat video atorlugu nakkutilliinerit perorsaanermik suliaqarnermut taarsiutaassanngitsut.