Nakorsap toqutsisoq naliliiffigeqqissavaa
Nukappissamut maanna 16inik ukiulimmut Aalborgimi 2007imi arnamik 85inik ukiulimmik pinngitsaaliilluni atoqateqarlunilu toqutsisumut suliaq novembarip 13iani eqqartuussivimmi saqqummiunneqassaaq.
Taamak Nordjyske Stiftstidende allappoq.
Uani suliaq nassuernermit tunngaveqarluni ingerlanneqassaaq.
Nakorsat eqqartuussivimmi atugassanik naliliisartut taamanikkut nalilereerpaat nukappiaq 16-inik ukiulik ullumikkut inissiisarfimmi matoqqasumik inissinneqarsimasoq nalinginnaanngitsumik silatussutsimigut appasinnini pissutigalugu nalinginnaasumik pineqaatissinneqarsinnaanngitsoq. Taamaakkaluartoq nakorsat eqqartuussivimmi atugassanik naliliisartut qinnuigineqarsimapput nukappissaq eqqarsartaatsimigut qanoq innera nalilersoqqissagaat.
Naliliineq killilersuinissaq qanoq annertutiginissaanut naliliiniarnermut atugassaavoq, taamalu nukappiaq 16inik ukiulik pinerlunnermi tassani pineqaatissinneqarpat sapinngisamik pitsaanerpaamik toqqammaveqarluni tunngaveqarnissaq kissaatigineqarpoq.