Nakorsaq kalaallit uummataasa tillerneranik misissuisoq
Maanna Ilisimatusarfimmi misissorneqalerpoq inuiaat kalaallit allaniit uummatiptillerneranik ajuuteqarnissaminnut qaninnerunersut.
Inuit ilaasa kassutsitsineq misigisarpaat – assersuutigalugu asannilersoorsimatillutik.
Tamannalu pissusissamisoorluinnarpoq. Taamaassappat suut tamarmik ajorsimassanngillat.
Utoqqaliartortillunilu uummatip tilleneranik ajuuteqarnissamut qaninnerusarpoq – tamannalu ajornerujussuarmut aallarniutaasoq paasineqapallassinnaavoq. Uummatimmi tillerneranik ajuuteqarneq qaratsakkut taqqanik milittoornerit 20 procentiisa peqqutigisaraat ilimagineqarpoq
Tamanna Ilisimatusarfimmi ph.d.-ngorniarnermi tunngaviusoq, tassani nakorsap Nadja Albertsenip Kalaallit Nunaanni uummatip tillerneranik ajuuteqarnerup atugaanera misissorlugu. Suliniummi naqissuserneqassaaq Kalaallit allaniit uummatip tillerneranik ajuuuteqarnerunersut.
Aviisi Sermitsiaq allappoq.
Qaratsami taqqanik milittoornermik kinguneqarsinnaasoq
– Nunarsuarmitamarmik inersimasut 50-iugaangata ataaseq marluk uummatip tillerneranik ajuuteqarsinnaapput, taqqat aalangusernerannik taaneqartumik imaluunniit forkammerflimmer – uummatip ineeraanik aalangusertitsineq, tamannalu qaratsakkut taqqanik milittoornerit tamarmik 20 procentiisa missaanni peqqutaatinneqartarpoq, Nadja Albertsen siusinnerusukkut Kalaallit Nunaanni sulisimavoq maannali Aalborg Universitetshospitalimi Geriatrisk Afdelingimi sulisoq oqarpoq. (Geriatri tassaavoq utoqqaat nappaataannik ilisimasaqarneq).
– Siusinnerusukkut ilisimatusarnerit tikkuussipput Kalaallit napparsimasut pingajorarterutaasa missaat qaratsamikkut taqqanik milittoorsimasut uummatip ineeraanik aalangusertitsisut, taamaattumillu misissorusupparput Kalaallit uummatip ineeraani aalangusertitsinerat allaanerunersoq assersuutigalugu danskinit.
– Kalaallit innuttaasut taamatut nappaateqareersut aallaavigalugit misissuinitta siulliit takutippaat atugaanera tamakkiisoq Danmarkimisuulli inissisimasoq paasisaqarnerorusuppugulli.
Allaaserisaq tamarmiusoq Sermitsiami saqqummertumi kingullermi uani atuaruk:
