Nakorsaq piumaneqarluartoq aallarniarluni pilersaaruteqarpoq: Ineqarnermut akiliuteqarnissamut akissaqanngitsoq
Pisussaanngitsoq pivoq. - Inissiamik akilerneqarsinnaasumik nassaarsinnaanngilanga, nakorsaq immikkut ilisimasalik misilittagartooq, nakorsiartut angallanneqarnerannut nunatta karsianut aningaasarpassuarnik sipaartitsisinnaagaluartoq oqarpoq.
Nakorsaq immikkut ilisimasalik Thomas Sonne Nuummi Dronning Ingridip Napparsimmavissuani maajip 31-ani suliunnaartariaqalerpoq, taamanikkussamullu Danmarkimut uterniarluni pilersaaruteqarpoq, tassani ineqarfissaarussagami.
Taanna peqqinnissaqarfimmi sulisut ilagaat Nuummi Qatserissuni sulisunut inissianut akisuunut nutaanut akiliinissamut qujaannartariaqartoq, AG-p sapaatip akunnerani kingullermi tamanna allaaseraa. Nalunaarut ernumanartoqartitsivoq – aamma sulisunit allanit.
Aviisi AG taama allappoq.
- Nakorsap inissisimanera pissutsinut erseqqissaataalluinnarpoq. Nakorsanik aamma peqqissaasunik pisariaqartitsilluinnarpugut, ineqarnermullu akiliutinik qaffasissunik aporfilersorneqarnissarput pisariaqartinngilarput, Ken Jensen, Peqqissaasut Kattuffianni (PK) siulittaasoq, AG-mut taama oqarpoq.
Ken Jensenip ilisimatitsissutigaa nammineq ilaasortami akornanni, peqqissaasut akornanni, Qatserisunit inissiat 90-it attartornermut akii pillugit pakatsinermik uumitsannermillu pisoqartoq. Inissiaq marlunnik initalik 11.000 koruuningajannik akeqartarpoq, sisamanillu initalik 18.000 koruuningajannik akeqarluni. Saniatigullu atuinermut akiligassat.
- Ilaasortama tamanna akissarsiaminnik akilersinnaanngilluinnarpaat. Tamanna sulisussarsiornermut ilungersunartunut ilanngussinnaavoq, Ken Jensen oqarpoq.
Aviisimi AG-mi nakorsap soraarnerminut tunngavilersuutai atuarsinnaavatit. Aviisi uani pissarsiariuk:
