Nakorsaq: Taamaattumik ernisarfik matussaaq
Maniitsumi ernisarfiup matusinissa isumanaatsumik ernisoqartarnissaa pillugu aalajangerneruvoq, Qeqqani peqqissaaviup nakorsat pisortaat oqarpoq
- Tassa ernisut isumannaatsumik ernisinnaanissaannut tunngaviusut pissutigalugit, Maniitsumi ernisarfik isumannaatsumik ingerlassappat naammassisassat pingaarnerit pingasuusut naammassineqarsinnaanngimmata ernisarfiup matunissaanik aalajangiisoqarpoq.
Qeqqani Peqqinnissaqarfiup immikkoortortaqarfiani nakorsat pisortaat Ove Rosing Olsen Radio aviisimut oqarpoq.
Maniitsumi napparsimavimmi erninerliortunik passussisussaaleqivoq. Pilattaanikkut aamma ernisitsisoqartariaqarsinnaasarpoq, taamaalisoqaraangallu ilisimajunnaartitsisinnaasunik peqartoqartariaqarluni. Taamatulli piginnaanillit Maniitsumi aamma sulisorineqanngillat, pissutsillu taamaattut Maniitsumi ukiualunni atuussimasut, nakorsat pisortaata oqaatigaa.
Peqqissaavimmi sulisut naammaginngilluinnarpaat namminneq innuttaasullumi aatsaat apriilip sisamaanni ernisarfiup maajip aallaqqaataani matunissaanik kalerrinneqaramik.
Juumooqarneq aalajangiisuunngilaq
Maniitsup peqqissaaveqarfiani ernisussiortoq Rikke Kuhn maajip aallaqqaataani Nuummut nuuttussaavoq, Rikke Kuhnilli Nuummut nuuttussaanera aalajangernermut pingaarnertut tunuliaqutaanngitsoq oqaatigaa, peqqissaaveqarfiulli naammassisaqarsinnaassusiata pingaartinneqarnerunissaa tunuliaqutaalluni, isumannaatsumik ernisitsisoqarnissaa pingaartinnerullugu, Ove Rosing Olsen, KNR'imut naqissusiivoq.
Maniitsumi ernisarfik maajip aallaqqaataa matuppat, Maniitsumi nunaqarfiinilu najugallit ernivissaq sioqqullugu ullut 14'it Sisimiuniittalertariaqarput.