Nakuuserneq filmiliarineqartoq: Eqqugaasup ilaqutaanut peqatigiiffik katersuiniuussivoq

Peqatigiiffik MAPI, nalinginnaasumik inunnut peqqinnissaqarfimmit sullinneqarnermikkut ajornartorsiuteqartunut ikiuiniartartutut ilisimaneqartoq, maanna Nuummi nakuusertoqarsimanerata kingunerisaanik ikiuiniarluni katersinialerpoq.

Peqatigiiffik aningaasanik katersiniarpoq ilaqutariit eqqartuussissuserisumut aningaasartuutissaat matussusersinnaaniassammassuk, erniusoq 18-nik ukiulik nakuuserfigitissimammat. Saassussineq pineqartoq filmiliarineqarsimavoq inuillu nittartakkatigut attaveqaqatigiittarfiini agguaanneqarsimalluni.

Siulittaasoq Laila Bertelsen Sermitsiaq.AG-mut oqarpoq aningaasat katersorneqartut ilaqutariinnut eqqugaasunut ikiuinissamut atorneqartussaasut:

- Sakkortuumik nalaataqarnermi oqaloqatiginninnissamut periarfissaqartitsisoqartariaqaraluarpoq. Matumani suliami ilaqutariit ikiorneqaratik kisimiivipput. Taamaammat katersat ilaat sakkortuumik nalaataqartoqarnerani oqaloqateqarnissamut Nuummi periarfissiiniutititut atorneqassapput, Laila Bertelsen oqaluttuarpoq.

Siulittaasoq: Nakuusertarneq unitsinneqartariaqarpoq

Laila Berthelsen nangilluni oqaluttuarpoq, aningaasat ilaat ilaqutariit eqqartuussissuserisumik sulisitsisinnaanissaannut aamma atorneqassasut, tassuunatigullu periarfissaqassappat meeqqat inuusuttullu saassussisimasut akisussaatinneqarnissaat pillugu inuit saqitsaannerat tunngavigalugu eqqartuussivinnut suliassanngortitsisoqarsinnaaniassammat.

Laila Berthelsen naapertorlugu nakuuserluni saassussineq inuusuttunit arlalinnit piliarineqarsimavoq, taakkulu ilaat 15-it ataallugit ukioqarlutik.

- Nukappiaqqat sumiginnagaapput, inoqatitik ulorianartorsiortissinnaagunikkit. Tamanna unitsinneqartariaqarpoq, Laila Bertelsen oqarpoq.

Laila Bertelsen sisamanngornermi aalajangertariaqarsimavoq Facebook aqqutigalugu katersiniarnini ersigunnaartissallugu, inuiit ilaasa qisuariarnerat sakkortusimammat.

Uppernarsaapput nakuuserluni saassussisoqarsimasoq - marluk unnerluutigineqarput

- Inuit ajornartoortut ikiortarpagut. Tamannalu matumani sakkortuumik nakuuserluni saassussisoqarsimaneranut atatillugu atuuppoq, Laila Berthelsen Facebookimi allappoq. Naallu massa saqqummiussimasaq peerneqarsimagaluartoq katersuiniarneq ingerlaannarpoq.

Nunatsinni Politiit misissueqqissaarnermik suliaqartitaasa pisortaat, Lars Bjerregaard, Sermitsiaq.AG-mut uppernarsaavoq ulloq 16. december inuusuttut kattussillutik nakuuserlutik saassussisimasut.

Misissueqqissaartartut pisortaat oqarpoq, politiit suliaq naammassiniarlugu maannamut nukippassuarnik atuisariaqarsimallutik. Manna tikillugu inuit marluk nakuusersimasutut unnerluutigineqarput.

Taamaattorli Lars Bjerregaard sukumiinerusumik oqaaseqarsinnaanngikkallarpoq suliamik misissueqqissaartoqarnera suli ingerlammat.

Politiit mianersoqqusipput immiussat unioqqutitsilluni tamanut siammarterneqannginnissaat pillugu

Oqaaseqarsinnaanini killeqaraluartut misissueqqissaartartut pisortaat oqaluttuarpoq, nakuuserluni pisimasoq, suulluunniit assilisat immiussalluunniit nakuusertunik imaqartut pillugit politiit mianersoqqusariaqalernerannik pissutissaqalersitsisimasoq:

- Paatsuugassaajunnaarlugu erseqqissaatigissavarput assilisanik immiussanilluunniit taamaattunik siammarterineq inerteqqutaammat, pinerluttulerinermillu inatsimmik unioqqutitsinerummat. Politiit tungaannit taamaattoqarnera ilungersunartutut tigullugu suliaraarput, immiunneqarsimasumimi inuit videomi nittarsaanneqarlutik ersersinneqartut ilisarineqarsinnaammata, politiet erseqqissaateqarlutik saqqummiussaminni oqarput nangillutillu:

- Pingaaruteqartorujussuuvoq eqqarsarluarnissaq, aamma pingaaruteqartorujussuuvoq assilisanik aalasulianilluunniit taamaattunik tamanut takusassanngorlugit agguaasseqqusaannginneq eqqaamassallugu. Inatsisinik unioqqutitsinerinnaanngilaq. Eqqugaasunulli aamma annertoorujussuarmik kingunerlutsitsisarput.

Lars Bjerregaard itisiliivoq, aalasuliat taamaattut tamanut simmarterneqarnissaat inerteqqutaasoq pinerluffigitissimasoq aammalu pinerluffiginnissimasut pillugit, aammalu minnerunngitsumik pinerluffiginnissimasut immiussat taamaattut atornerlullugit politiit suliamik misissueqqissaarnerannut akornusersuutaasinnaammata.