Nakuusertoq politiinit tigummigallarneqartoq
Angut 30-inik ukiulik nakuusertoq 41-nik ukiulik unatariarlugu qimaavoq
Arfininngormat unnuakkut Nuummi politiit nalunaarfigineqarput festernermut atatillugu kamaattoqartoq. Politiit takkukkamik paasivaat angutip 30-inik ukiullip angut 41-nik ukiulik unatarsimagaa. Ilaatigut 41-nik ukiulik isimmitsariarlugu tukkariarlugulu qimaasimavoq.
– Angulli kinguninngua tigusarineqarpoq arfininngornermilu inatsisit tunngaviusut malillugit killisiorneqarluni. Ulluni tallimaagallartuni tigummigallagassanngortinneqarpoq, taamatut oqarpoq vicepolitiinspektør Bent Heiselberg.
– Politiit persuttaavimmut takkummata persuttarneqarsimasoq ilisimanngilaq. Angut nakorsiartarfiliaanneqarpoq kingornalu qaratsaminik sajuppillatsitsisimaneranik nakkutigisassanngorlugu ajoqusernerinillu katsorsagassanngorlugu unitsinneqarluni.
Sapaatip akunnerata naanerani Nuummi politiit 20-nik nalunaarusiorput tassaasunik unioqqutitsilluni kalerrisaarineq, nakuuserneq, illumut iserluni tillinniarneq, biilimik aallarussineq, pisiniarfimmi tillinniarneq, sanasut suliffianni tillinniarneq, nassaanik unioqqutitsilluni piumasaarsorneq, aserorterineq, aqqusinikkut angallannermi ajutoorneq, imigassartorsimalluni biilerneq aamma politiit inatsisaannik unioqqutitsineq.
Ilaatigut nalunaarutigineqarsimapput illumi perulluliornerit quingiluat aqqusinermilu perulluliorneritpingasut, Bent Heiselberg paasissutissiivoq.