Naleqqami politikeri sulinngiffeqarnissamik qinnuteqarpoq
Inatsisartuni aamma Kommuneqarfik Sermersuumi kommunalbestyrelsemi ilaasortaq Emanuel Nûko (N) sapaatit akunnerini marlunni napparsimalluni sulinngiffeqassalluni qinnuteqarpoq. Tamanna nammineerluni Sermitsiaq.AG-mut uppernarsarpaa.
Naleraq sinnerlugu Inatsisartuni ilaasortaq, Emanuel Nûko, uippakajaarneq pissutigalugu Inatsisartunit napparsimalluni sulinngiffeqarnissamik qinnuteqarsimavoq. Tamanna nammineerluni Sermitsiaq.AG-mut uppernarsarpaa.
- Ulluni 14-ini sulinngiffeqartussanngorpunga. Uippakajaarneq pissutigalugu sulinngiffeqassallunga qinnutigaara, taamaattumik sulingallassanngilanga, Emanuel Nûko Sermitsiaq.AG-mut oqaluttuarpoq.
Pilersaarutit malillugit Inatsisartuni sulineq ingerlassappat, ukiakkut ataatsimiinnermi ataatsimiiffissaq ulloq kingulleq tassaavoq 10. november. Tamanna isumaqarpoq Emanuel Nûko upernaakkut ataatsimiinnermi aatsaat peqataaqqilissasoq.
- Soorunami ilaasortannguarput ataaseq peqataajunnaaraangat nukinnik atuiffiunerulertarpoq uagutsinnut sinneruttunut, Naleqqami gruppimi siulittaasoq Jens Napaattooq oqarpoq, erseqqissarluguli Nûkop inissisimanera paasisinnaalluarlugu.
Sinniisussamik tikisitsinissaq angumerineqanngitsuulersoq
Emanuel Nûko Inatsisartunut qinersinermi 161-init taaneqarluni ilaasortanngorsimavoq, Kommuneqarfik Sermersuumilu kommunalbestyrelsemi aamma ilaasortaalluni. Politikeri ilisimatitsivoq kommunalbestyrelsep ataatsimiinnissaani tullermi aamma peqataassanani, napparsimanini pissutigalugu.
Naleqqap partiit ganngiani ilaasortaatitai marluusut, Inatsisartuni ataatsimiinnerni peqataanissaminnut maanna pilersaarusiorput. Partiip siulittaasuat politikeritut atuuffini pissutigalugu USA-mut ataatsimiigiarami Inatsisartuni ukiakkut ataatsimiinnermi peqataaqqikkallassanngilaq. Naleraq Inatsisartuni sisamanik qinigaatitaqartoq, maanna marluinnarnik issiasoqarallassaaq. Jens Napaattooq aamma Hans Enoksen ukiakkut ataatsimiinnerup peqataaffiginissaanut akunnerminni suliassanik agguataarinnipput.
- Siulittaasoqarfimmut qinnutiginikuugaluarparput sinniisussamik tikisitsinissaq, ilaasortaatitattali sulinngiffeqarnissamut qinnuteqaataata suliarineqarnera teknikkikkut ilungersunarsimammat, sinniisumik tikisitsinissamut piffissaaruttoorluinnaratta tamanna ilimanarunnaarpoq, Jens Napaattooq oqarpoq nangillunilu:
- Uanga Hans Enoksenilu misilittagartuujuvugut, ataatsimiinnissanullu suliassagut peqataanissagullu akunnitsinni agguataarpagut, Inatsisartuni parteerput sinnerlugu marluinnaalluta peqataasussanngoratta, oqarpoq.
Emanuel Nûkop eqqartuussaasinnaannginnera Inatsisartunit 2022-mi ukiakkut atorunnaarsinneqarpoq, tamassumalu kingorna politikeri eqqartuussaasimalluni. Suliami pinngitsuutinneqaraluartoq, unnerluussisussaatitaasup suliassaq Nunatta Eqqartuussivianut suliassanngorteqqissimavaa. Nunatta Eqqartuussiviani suliami aamma pinngitsuutinneqarsimasoq, Pele Broberg ilisimatitsivoq.