Pisortat soraartut pingajuata kingorna
Naliliisartoq: Taarseraanneq pisarnermit annertuneruvoq
Naalakkersuisoqarfinni pisortat pingasut tulleriiginnarlutik atorfimminnit tunuarput. Politikkikkut naliliisartoq aamma ukiorpassuarni Namminersornerullutik Oqartussani atorfikkaaq Jakob Janussen tupaallappoq qullersat taama amerlatigisut tulleriiaarlutik soraarmata
Aatsaat iluamik eqqarsarnartoqalissaaq naalakkersuisoqarfimmi pisortanik tunuartoqaqqissappat naalakkersuisoqarfinni pisortat pingasut tulleriiginnarlutik martsip aqqaneq aappaanni qinersinerup kingorna soraareersut. Politikkikkut naliliisartoq Jakob Janussen taama naliliivoq.
Ilaqutariinnut inatsiseqarnermullu naalakkersuisoqarfimmi pisortaq Lise Lennert Olsen atorfimmini qimallugu allanik unammilligassarsiorniarpoq. Taamaasilluni naalakkersuisoqarfinni pisortat qinersinerup kingorna tunuartut pingajorilerpaat. Siornatigut ineqarnermut attaveqarnermullu naalakkersuisoqarfimmi pisortaq Steffen Ulrich-Lynge qinersinerup kinguninngua tunuarpoq.
Aningaasaqarnermut nunamullu namminermut naalakkersuisoqarfimmi pisortaq Jan H. Lynge-Pedersen sapaatip akunnera kingulleq erngiinnaq atuutilersumik tunuarportaaq.
- Qaqutigoorpoq pisortat taama amerlatigisut piffissaq sivikitsup iluani atorfimminniit tunuartarnerat, Jakob Janussen Sermitsiaq.AG-mut oqarpoq.
Taannali tunuarsimaarpoq Lise Lennert Olsenip tunuarneranut annerusumik oqaaseqarnissaminut.
- Ukiuni aalajangersimasuni atorfeqarnerup naanerani atorfillip allanik unammilligassarsiornera immini eqqumiitsortaqanngilaq. Kisianni pasillernissamut pissutissaqalersinnaavoq pisortamik allamik soraartoqassappat, Jakob Janussen oqarpoq.
Naalakkersuisoqarfimmili pisortat taarsernerat nutaamik aallartinnissamut aallarniutaasinnaavoq.
- Assut pissanganarpoq kikkut atorfinnut inuttassarsiorneqartunut inissinneqassanersut. Qularnanngitsumik sulisut pissangallutik utaqqivaat kina pisortartaarissanerlugu, politikkikkut naliliisartoq Flemming Enequist Sermitsiaq.AG-mut oqarpoq.
- Taarseraaneq aamma nutaamik aallartiffittut atorneqarsinnaavoq tamannalu aamma ajunngitsumik kinguneqarsinnaalluarpoq. Pissanganarporli kikkut suliamik kivitsisuujumaarnersut aamma suliat ingerlareersut ingerlaannarnissaannik nangitsisussat, Flemming Enequist oqarpoq.