Nalunaarusiaq: Kangerluarsunnguaq pingaarnerpaatinneqarpoq
Naalakkersuisut aamma danskit naalakkersuisui Nuummi Aasiannilu erngup nukinganik nukissiorfiliornissamut aningaasaliinissamut suleqatigiinnerup ingerlateqqinnissaa pillugu isumaqatigiissuteqarput.
Qasigiannguani Aasiannilu erngup nukinganik nukissiorfimmik nutaamik sanaartornissamit Utoqqarmiut Kangerluarsunnguanni erngup nukinganik nukissiorfiup allilerneqarnissaa siulliullugu suliarineqassasoq, Naalakkersuisut aamma danskit naalakkersuisuisa isumaqatigiissutaanni allassimavoq.
Aningaasaqarnermut akileraartarnermullu naalakkersuisumit, Erik Jensenimit (S) aningaasaqarnermullu ministerimit Nicolai Wammenimit sapaatip-akunnerani matumani isumaqatigiissut atsiorneqarpoq, naalakkersuisut tusagassiuutinut nalunaarummi ilisimatitsipput.
Suliniutit taakku marluk pingaaruteqarnerat assigiittoq, kisianni Utoqqarmiut Kangerluarsunngua pingaarnerpaasoq, nalunaarusiami erseqqissarneqarpoq:
- Isumaqatigiissutigineqarpoq misissueqqissaarneq aningaasalersornissaallu ima aaqqissuunneqarumaartut, Utoqqarmiut Kangerluarsunnguanni erngup nukinganik nukissiorfiliornissaq Nuummut pilersuisussaq piffissaq eqqarsaatigalugu siulliunneqassasoq, pilersaarusiornissamullu siunnersuutit inerisarneqarnerat suliniutillu ineriartortinnerat ilutigalugu Qasigiannguanut Aasiannullu pilersuisussaq tulliulluni, isumaqatigiissummi allassimavoq.
Akisussaassuseqarluni aningaasaliineq
Suliniutit “Kalaallit Nunaata aningaasaqarneranut sanilliullugit aningaasarpassuarnik naleqartut, suliniutillu Kalaallit Nunaanni inuiaqatigiinnut attaveqarnermut pingaarutilimmik pilersitsissasut” nalunaarusiami aamma allassimavoq.
- Suliniutit mingutsitsinngilluinnartut piviusunngortinnissaannut, suliniutinullu taakkununnga tamanut akisussaassuseqarluni aningaasalersuinissaq taamaattumik pingaaruteqarpoq“ nalunaarusiami allassimavoq.
Nalunaarut qanoq pilersaarnermik nalunaarummit 2022-mi marsimeersumit malittaavoq, isumaqatigiissullu naalakkersuisup Erik Jensenip nuannaarutigaa:
Oktobarip aallaqqaataani aalajangiisoqassaaq
- Nuummi, Qasigiannguani Aasiannilu erngup nukinganik nukissiorfiliornissaq Kalaallit Nunaanni mingutsitsinnginnerunissamut aalajangiisuuvoq.
- Aningaasaqarnermut Akileraartarnermullu Naalakkersuisoqarfiup aamma Aningaasaqarnermut Ministereqarfiup qanimut suleqatigiilernerat taamaattumik nuannaarutigeqaara, taamaalilluni erngup nukinganik nukissiorfiliornissamut suliniutit aningaasalersorneqarnissaat pillugu misissuineq maanna naammassineqarsinnaalerpoq, Erik Jensen oqarpoq.
Erngup nukinganik nukissiorfiliornissamut danskit qanoq aningaasaliissuteqarsinnaanersut kingusinnerpaamik 2024-mi oktobarip aallaqqaataani inaarutaasumik aalajangiisoqassaaq, Folketingimilu akuerineqassalluni.