Nalunaarusiaq: Kommunit inatsimmik malinninngitsoortariaqartartut
Ulloq unnuarlu angerlarsimaffinni najugaqartunut misissuinerit iliuusissatullu pilersaarusiornerit nutarsarneqarsimanissaat angummanniarfiungaatsiarpoq. Ulloq unnuarlu angerlarsimaffiit pillugit qulaajaanerup tamanna takutippaa.
Meeraq inuusuttuararluunniit ulloq unnuarlu angerlarsimaffimmut inissittussanngoraangat, ulloq unnuarlu angerlarsimaffik inatsisitigut pisussaavoq iliuusissatut pilersaarusiussalluni, ukiullu tamaasa pilersaarummik nutarterisassalluni. Angerlarsimaffiup avataanut inissiinermut atatillugu meeraq aamma misissorneqaqqaartussaavoq. Misissuineq pereersimassaaq meeqqap immikkut tapersersorneqarnissamik pisariaqartitsisinnaaneranik kommunalbestyrelsep ilisimalerneranit qaammatit marluk qaangiutsinnagit.
- Kalaallit Nunaanni immikkut ilisimasanik meeqqani inuusuttunilu siusinnerusukkut misissuisimanerup takutippaa, sullissineq inatsillu piviusumut naapertuutinngittoq. Misissuinerit taakku ilaatigut takutippaat, akuttunngitsunik isumaginninnermut tunngasunik misissuisoqaranilu iliuusissatullu pilersaarusiortarnerit akuttunngitsunik sananeqartannginneri takussaasut, suliallu ingerlaarneri tunngaviusumik unamminartoqartaqisoq ilaatigut sulisunik pissarsiniarnerup ajornartorsiutaanera aamma suliaqarpallaarneq pissutigalugit, "Kalaallit Nunaanni ulloq unnuarlu paaqqinnittarfinni qulaajaanermi" nalunaarusiami allassimavoq.
Inatsi anguniagaqarluartoq
Nalunaarusiami erseqqissarneqarpoq inatsit, qaammatit marlunngortinnagit meeqqap pisariaqartitaanik pisinnaasaanillu misissuereersimanissamik imaqartup, anguniagaqarluartuusoq, tamannalu ajunngissinnaasoq.
- Illuatungaatigut ajunngissuteqarsinnaavoq inatsimmi kommunit sullissinissaannut anguniakkat sukanganerutinnissaat. Aappaatigullu inatsisitigut piumasaqaatit maannakkut atuuttut ima sukangatigaat, kommuninut ajornakusoortorujussuulluni inatsimmik malinninnissaq, qanorluunniit pitsanngorsaatigigaluarunik, allassimavoq.
Iliuusissatut pilersaarutit nutarterneqanngitsut
Meerarli ulloq unnuarlu angerlarsimaffimmut inissinneqarnermini, namminersorlutik oqartussat, kommunit namminersortulluunniit ataanniugaluarpat, meeraq pillugu nutartertuartunik iliuusissanik pilersaaruteqartassaaq. Ulloq unnuarlu angerlarsimaffiit aperineqarnerminni akissutaat naapertorlugu, meeqqat 42 procentii ukiup ataatsip ingerlanerani iliuusissatut pilersaarutaat nutarterneqarsimapput.
Kommunekkaarlugit misissoraanni Kommuneqarfik Sermersuumi meeqqat inissinneqarsimasut 38 procentii iliuusissatut pilersaarutaannik nutarteriffigineqarsimapput. Qeqqata Kommuniani meeqqat inissinneqarsimasut 79 procentii iliuusissatut pilersaarutaannik ukiup ataatsip kingulliup ingerlanerani nutarteriffigineqarsimallutik. Kisitsisit 2019-imi pissarsiarineqarput.
Misissuinerit naammanngitsut
Angerlarsimaffiup avataanut inissinneqannginnermini meeqqap unammilligassai nukittuffiilu misissuiffigineqareersimasussaapput. Tamannali aamma unammillernartoqarpoq.
Nalunaarusiami kisitsisit takutippaat kommunit ataatsimoortikkaanni, meeqqat inuusuttullu 0-23-nik ukioqartut 25 procentii, ulloq unnuarlu angerlarsimaffimmut inissinneqannginnerminni, misissorneqarsimasut misissorneqartartut.