Nalunaarusiaq: Nipangiussineq aliasunnermik sakkortusaallunilu sivitsorsaasarpoq
Ilisimatusarnikkut misissuinermi nalunaarusiaq "Aliasunneq - Ilinniartut inuusuttut annaasaqarsimasunut qarasaasiakkut tapersersoqatigiiffimmi periarfissaat. Misiliutitut suliniut" saqqummerpoq. Nalunaarusiami ilaatigut atuarneqarsinnaavoq aliasunneq avitseqateqarluni oqinnerulersartoq.
Nipangiussineq aliasunnermik sakkortusaallunilu sivitsorsaasarpoq, aliasunneq ajornartorsiutinngortittarpaa. Aliasunnermik avitseqateqarluni oqinnerulersarpoq, ilaatigut misissueqqissaarneq taama tikkuussivoq.
Kalaallit Nunaanni ilinniartut tamarmik tarnip pissusaanik immikkut ilisimasalimmik oqaloqateqarnissaminnut periarfissaqarput. Ikiortissarsiortartut amerlanerit ilaquttap, ikinngutip aapparisalluunniit toqukkut qimagunneranut atatillugu aliasunnertik iliuuseqarfiginiarlugu ikiortissarsiortarmata suliniut pilersinneqarpoq.
Misiliutigalugu misissuinermi nalunaarusiami peqataasut aliasuutip iliuuseqarfiginissaanut, kulturikkut inuiaqatigiinnilu piumasaqaatit kinguneriumaagai, kiisalu qarasaasiakkut tapersersoqatigiit naapertuunnerat paasiniarlugit, Aliasunneq qulequtsiullugu tapersersoqatigiit siulliit marluk malinnaaffigineqarput.
Aliasunnermik avitseqateqarluni oqinnerulersartoq
Ilinniarfimmi siunnersortit ilinniartitsisut ilinniartunut annaasaqarsimasunut pingaaruteqartuusut misissuinerup tikkuarpaa. Taakkuummata takunnissinnaasut ilinniartup artorsaateqarnerannut. Siunnersortiukkajupput ilinniartitsisuukkajullutillu ilinniartut ikiortissarsiornissaannut kaammattuisartut.
Nalunaarusiaq naapertorlugu annaasaqarsimasut tapersersoqatigiit, inuit aliasuuteqartut misigissutsinik avitseqatigiinnerisigut aliasuuteqartunut ammartitseqataasinnaapput. Tamanna ilinniarfimmut ilaquttaminnullu nassarsinnaavaat. Taamaalillutik ammarnissaannut aallartitatullusooq atuussinnaallutik.
Inuiaqatigiit tapersersuinerussapput
Misissueqqissaarnerup takutippaa ilaqutariinni qanigisariinnilu allani aliasunnermi misigissutsinik nipangiussineq, allanik annaasaqarnermik kinguneqarsinnaavoq; ass. ilaqutariit aappariillu akornanni attaveqatigiinneq ajornakusuulersinnaavoq, aappariit misigissutsikkut avissaarsinnaapput, qimataasut imminut toqunnissamik eqqarsalersinnaapput, imminut toqoriarsinnaapput imal. aliasunneq ingalassimaniarlugu imigassamut hashimulluunniit saassinnaapput.
- Inuiaqatigiittut, qanoq ililluta inuit annaasaqartut aliasunnerminni pilertortumik ikiortissarsisinnaanissaannut pitsaanerusumik ikorfartuisinnaanissatsinnik misissuinissarput pisariaqarpoq.
Sussanne Hangård Vendelbo Anja Hvidtfeldt Stanekilu nalunaarusiap suliarinissaanut piviusunngortitsisuupput. Taakkua naapertorlugit inuusuttut illoqarfii inunngorfii, illoqarfii najugaqarfii illoqarfiillu ilinniarfiit akimorlugit annaasaqarnermut atatillugu aliasuummut iliuseqarfiginninnermut ikiorserneqarsinnaanngorlugit, illoqarfiit assigiinngitsut akornanni annaasaqarsimasunut ataqatigiissaakkamik iliuuseqarnissaq pisariaqarpoq:
- Toqukkut qimataanerup kingorna ikiorneqarnissamik pisariaqartitsisunut tamanut, soorlu meeqqanut, inuusuttunut, inersimasunut, utoqqarnut, ilinniartunut, suliffeqartunut suliffeqanngitsunullu neqeroorutinik inerisaanissarput pisariaqarpoq.
Nalunaarusiaq 43-nik qupperneqartoq aqqut.gl -imi atuarneqarsinnaavoq.