Nalunaarusiaq nutaaq: Kina Kalaallit Nunaanni inissisimaffissarsiorpoq
USA-p sillimaniarnermut politikkimut soqutiginninnerulernera maannamut Kinamiut Kalaallit Nunaanni aallussinerannut iliuuseqarsinnaaneranullu annikillisitseqqavoq, kisianni Kinap Kalaallit Nunaata suleqatiginissaanut ungasissoq isigalugu pilersaaruteqartoq maluginiarniartariaqarpoq, Danmarkimi Illersornissaqarfiup isertortumik paasiniaasartui ukiumoortumik nalilersuinerminni taama allapput.
Illersornissaqarfiup isertortumik paasiniaasartuisa juulli sioqqutilaarlugu isumannaallisaanermut tunngatillugu naliliineq “Udsyn” saqqummiuppaa, Naalagaaffeqatigiinnermut maanna ulorianartorsiortitsinerit pingaarnerit ulorianartorsiortitsisinnaasullu taassuma imarai. Tassani ilaatigut Ruslandip, USA-p aamma Kinap akornanni ilungersunartorsiornerup Issittumi ineriartornermut nassuiaasersuisussaanerat ilaatigut atuarneqarsinnaavoq, taakkulu Naalagaaffeqatigiinneq sunnissagaat.
”Rusland Issittumi naalagaaffinni siuttutut imminut isigivoq sakkutooqarnikkullu atortuminik nunat killiusut soqutigisaannik ulorianartorsiortitsisinnaasumik suli annertusiartortitsivoq. USA nunallu killiusut allat taamaammat sakkutooqarnikkut annertunerusumik aamma peqataanerulerput, Ruslandip nunap immikkoortuani inissisimanera iliuuseqarfiginiarlugu. Nunap immikkoortuani sinaakkutit Kinap ilusilersueqataaffigerusuppai, Kinap sunniuteqarniarnera pingaartumik USA-p akiorniarsaraa”, nalunaarusiami tamanna allaqqavoq.
Kinap Kalaallit Nunaanni peqataanera killeqartoq
Kina ukiorpassuarni Kalaallit Nunaanni aningaasaliinissamut suliniuteqarnissamullu soqutiginninnerminik takutitsisarpoq, pingaartumik aatsitassarsiornermi attaveqarnerullu iluani. Suliniutinilli suli piviusunngortitsisoqanngilaq, Kinamiullu suliffeqarfiisa Kalaallit Nunaanni peqataanerat suli killeqarpoq.
USA-p sillimaniarnikkut politikimi Kalaallit Nunaanni soqutiginninnerulernerata Kinamiut Kalaallit Nunaanni aallussinerat iliuuseqarsinnaanerallu maannamut annikillisissimasinnaagaa, nalunaarusiami oqaatigineqarpoq.
Oqaluttuaq tamaat aviisimi Sermitsiami, sapaatip-akunnerani matumani saqqummersumi atuaruk, ugguuna iserfigisinnaavat: