Nalunaarusiaq: Saarullinniarneq ajalusoorsinnaavoq
Naalakkersuisut sineriammut qanittumi saarullinniarnissamut akuersissutinik tunniussisarnertik killilersortariaqarpaat, taamaanngippammi saarullikilliartornera ingerlaannassaaq. Tamannalu aningaasaqarnikkut inuttullu annertuumik kingunerlussaaq, Namminersorlutik Oqartussat nalunaarusiami naliliipput.
Inassuteqaatit sinningaatsiarlugit pisassiissuteqartarneq, aalisarsinnaanermut akuersissutillit amerliartuinnartut aalisakkallu milliartortut. Tassa taakku tamarmik ataatsimut isigalugit, sineriammut qanittumi saarullinniarnermik kingunerlutitsingaartumik ajorseriartitsisinnaapput.
Saarullinniarneq pillugu nalunaarusiami Aalisarnermut, Piniarnermut Nunalerinermullu Naalakkersuisoqarfiup suliarisimasaani politikkerinut mianersoqqussut taamatut nipeqarpoq.
Nalunaaruisatigut polikkerit siunissami aalisarnermut politikkissamut ikiorserniarneqarput, taamaammallu arlalinnik inassuteqaatitaqarluni.
Suliffissaqartitsiniarnermik sunnerneqarsimasoq
Nalunaarusiami inerniliunneqarpoq, aalisarnermut politikki suliffissaqartitsiniarnermik sunnerneqarsimasoq, Kalaallit Nunaanni sumiiffippassuarni suliffissanik allanik periarfissaqartoqannginnera pissutigalugu. Taamaammat ukiut tallimat kingulliit ingerlaneranni aalisarsinnaanermut akuersissutinik nutaarpassuarnik tunniussisoqartarsimavoq.
Politikkerilli eqqarsarluartariaqarput, aalisakkammi ikiliartornerat ingerlaannassappat, aalisarnermut akuersissutaatillit aalisarnermik inuussutissarsiorsinnajunnaassapput:
- Aalisartooreersut aningaasatigut pitsaanerusumik tunngavissaqassappata, aalisarsinnaanermut akuersissutinik nutaanik tunniussuisarnerup killilersorneqarnissaa pisariaqarpoq, naalakkersuisoqarfik allappoq.
Aalisarsinnaanermut akuersissutinik amerlanerusunik tunniussuisoqarnerata nalaani biologit saarullittassanik appaasoqarnissaa inassutigisarsimavaat, Naalakkersuisulli inassuteqaatigineqartut sinningaatsiarlugit pisassiiuartarsimapput:
Piffissami sivisunerusumi aalisartoqarsinnaanerata qulakkeerneqarnissaa pingaaruteqarnerusoq
- Annertuumik aalisartoqartuartillugu aalisakkat amerlassusaat ajortumik sunnerneqassapput, taamalu piffissami sivisunerusumik aalisarsinaaneq ajoquserneqarluni.
- Aalisakkat ikiliartorneranni iluanaaruteqapallanniarluni aalisarnermut sanilliullugu, piffissami sivisunerusumi aalisartoqarsinnaanerata qulakkeerneqarneratigut inuiaqatigiit aningaasaqarnerisa pitsaanerulernerat Kalaallit Nunaannut iluaqutaasussaavoq, naalakkersuisoqarfik nalunaarusiami allappoq.
Naalakkersuisut aalajangersimapput, nalunaarusiaq Aalisarneq pillugu Ataatsimiititaliarsumut ilisimatitsissutitut nassiunneqassasoq. Ataatsimiititaliarsuaq sineriammut qanittumi aalisarnermut inassuteqaateqassaaq.