Nalunaarut nutaaq: Nagguaatsut - naaggaarpagut
Maanna apeqqusigassaanngitsumik aalajangiunneqarpoq: Nagguaatsut Kalaallit Nunaannut eqqunneqarsinnaanngillat. Inoqajuitsup teriarsuit, kuukooriarsuit uumasullu allarpassuit assigalugit.
Kalaallit Nunaanni uumasut miluummasut, timmissat aamma paarngortut kissaatigineqanngitsut allattorsimaffiat tallimangajannik qupperneqartumi tamanna atuarneqarsinnaavoq, ”Maani uumasunut nappaatinik tuniluussinnaasunut imaluunniit Kalaallit Nunaanni uumasut illersornissaat eqqarsaatigalugu illersorneqarsinnaanngitsumik uumasuuteqarnermut”, aalisarnermut, piniarnermut nunalerinermullu naalakkersuisoqarfik taama oqaasertaliivoq.
Uumasut immikkuullarissut uumasuutigineqarnissaannut inerteqqummik nalunaarummik nutaamik naalakkersuisoqarfik ullut arlaqanngitsut matuma siorna tusarniaanermik aallartitseqqammerpoq. Uumasut eqqussinnaanngisappit allattorsimaffiat uani takusinnaavat.
Uumasut uku eqqussinnaavatit
Qimminik qitsunnillu nuannarisaqartut inerteqqummut ernumassutissaqanngillat. Taakku Kalaallit Nunaanni hamsterit, chincillat, kaniinat aamma marsviinit assigalugit inerteqqutaanngillat. Qimmilli qaasortut paasussiat eqqunneqaqqusaanngillat.
Timmissat uumasoqatigiiaat arfineq-pingasut eqqunneqarsinnaapput, tassa undulaatit, inimiutannguit, zebrafinkit, dværgpapikuujuit assigiinngitsut sisamat aamma nymfeparakittit.
Nalunaarummut nutaamut naammagittaalliorniaraanni, tunngavilersuutit naalakkersuisoqarfimmut maajip 17-anni nal. 16.00 sioqqullugu emailimut: apn@nanoq.gl nassiussisoqassaaq.