Nalunaarut: Royal Greenlandimut piumasaqaatit sukannerneruleriartortut
Naak Royal Greenlandip tulaassuisussaatitaanera Naalakkersuisunit appartinneqaraluartoq, aalisarnermik ingerlatseqatigiiffinnit allanit suli sukannernerusumik Royal Greenland piumasaqarfigineqarpoq, naalakkersuisoqarfimmit oqaatigineqarpoq.
Sulisitsisut aalisarnermut ataatsimiititaliaanni siulittaasup Henrik Lethip Naalakkersuisut qaleralittassiissutit Royal Greenlandip pigisaasa 100 procentiinik tulaassuisussaatitaanerata 25 procentimut appartinneqarnera isornartorsiorpaa:
- Namminersorlutik Oqartussat qaleralittassiissutit pillugit piumasaqaatinik allanngortitserujussuarput, aalisarnermik inuussutissarsiuteqartut tusarniaaviginagit. Royal Greenlandimut piumasaqaatit nutaat aatsaat allagaatitigut paasisimavavut, Henrik Leth sapaatip-akunnerata siuliani oqarpoq.
Allannguulli Henrik Lethip tupaallaatigisariaqanngikkaluaraa, Aalisarnermut Piniarnermullu Naalakkersuisoqarfik marlunngornermi tusagassiuutinut nalunaarummi allappoq.
Naalakkersuisoqarfik innersuussivoq Naalakkersuisut ukiut tamaasa avataasiorluni aalisartunut arlalinnut tulaassuisussanngortitsisartut, assersuutigalugu Arctic Fisheries ApS-ip saarullittassiissutigisartagai ukiut marluk matuma siorna 50 procentiniit 25 procentinut allanngortinneqarsimasut.
Naligiimmik tunisisussaatitaanermik kissaateqarneq
inassutigineqarpoq tulaassuisussaatitaaneq assigiaartuussasoq aamma siuner-tarineqassasoq nunanit allanit suliartortut pinnagit allanilli sulisoqartassalluni
Naalakkersuisoqarfik allappoq tulaassuisussaatitaaneq assigiiaartussaasoq aamma siunertarineqassasoq sulisunik nunanit allaneersunit sulisoqarneq pinnagu allatut siunertaqartoqassasoq – Royal Greenlandip suliffissuani Asiamiunik sulisussaqarnera eqqarsaatigineqarunarluni:
- (...) Attassiinnarnissamut Ineriartortitsinissamullu pilersaarut 2-mi immikkoortoq 4.2.1.4-mi allassimasut naapertorlugit inassutigineqarpoq tulaassuisussaatitaaneq assigiaartuussasoq aamma nunanit allanit suliartortut pinnagit allanilli sulisoqartarnissaa siunertarineqassasoq.
- Ilaatigut tamanna tunngaviuvoq, avataani qaleralinniartut pisassiissutinit niuerutigineqarsinnaasunik peqalersinnaanerinik atuutsitsilersinnaaneq aamma kissaatigineqarpoq, ingerlatseqatigiiffiit avataani qaleralinniartunut assigiimmik tulaassuisinnaatitaanissaat tunngavigineqarluni, tulaassarineqartut 25 procentiussallutik.
Naalakkersuisoqarfik: RG naapertuilluanngitsuliorfigineqarneruvoq
Naalakkersuisoqarfik nangilluni nassuiaavoq Royal Greenlandimut piumasaqaatit suli sukannernerusut:
- Royal Greenland A/S-imut aalisakkat pisassiissutigineqartut tulaassuisussaatitaasullu nerpiiarnissaat suli piumasaqaataavoq, ingerlatseqatigiiffiit allat taama piumaffigineqanngitsut. Aamma tunitsivinnut aalajangersimasunut piumasaqaateqartoqarpoq. Taamaattumik ingerlatseqatigiiffinnit allanit sakkortunerusumik maannamut suli piumaffigineqarput. Taamaattumik tamanna naapertuilluanngitsumik Royal Greenlandimut pissuseqarneruvoq.