'Nammineq qinersinermik aaqqissuussinikkut Danmarki Savalimmiullu aporaatilissapput'

EU-mi inatsiseqarnikkut nangaassuteqarnerup atorunnaarsinneqarnissaanut Danmark decembarip 3-anni akuersippat tamatuma kingunerisinnaavaa Danmarkip inatsisissani Bruxellesimi suliaritittalerai.

Taamaakkaluartoq Folketingi Savalimmiunut inatsisiliortunngorsinnaavoq. Aaqqissuussineq nalornisoornartulik, folketingimut ilaasortaq Sjúdur Skaale, savalimmiuni partiimit socialdemokratiskimit Javnadarflokkurinimeersoq oqarpoq.

Nammineq qinersinermik aaqqissuussineq

Sjúdur Skaalep tamanna saqqummiuppaa Folketingimi ammaanersiorluni oqallinnermi, sisamanngornermi oktobarip 8-anni. Tamassuma siuninngua inatsisinik atortitsinermut ministerimit Søren Pindimit (V) akissuteqarfigineqarsimavoq, qanoq pisoqassanersoq inatsiseqarnikkut nangaassuteqarneq atorunnaarsinneqassappat, Danmarkillu nammineq qinersinermik aaqqissuussinermik taaneqartoq atulerpagu.

Inatsisit immikkut ittut

– EU-mi inatsiseqarnikkut iluuseqarnerup kingunerisaanik qallunaat inatsisaat atorunnaarsinneqassappat pisariaqarsinnaavoq qulakkiissallugu Savalimmiuni (Kalaallillu Nunaanni, aaqqiss.) inatsiseqarnikkut pissutsit tamatuminnga sunnerneqannginnissaat. Tamanna pisinnaavoq Folketingimi inatsisinik, Savalimmiunuinnaq atuuttunik, akuersissuteqarnikkut, inatsisinik atortitsinermut ministeri akissummini allappoq.

Inatsisinik atortitsinermut ministeri aamma oqarpoq Savalimmiut - namminersornermut aaqqissuussinikkut periarfissaqarpat - oqartussaafeqarfik aalajangersimasoq tigusinnaagaa.

Sjúdur Skaale naapertorlugu tamatuma kingunerisinnaavaa Folketingi inatsisiliortalissasoq Savalimmiunuinnaq atuuttunik, aammalu - inatsisinik atortitsinermut ministerip aamma oqarneratut - Savalimmiut kissaataat malillugit sananeqartunik.

Nunat allamiunut tunngasut

Savalimmiuni naalakkersuisut socialdemokratinit aqunneqartut anguniagaraat nunat allamiunut tunngasut kiisalu inunnut, ilaqutariinnut kingornussisarnermullu inatsisit tigunissaat. Tamannalu Sjúdur Skaalep tapersersorpaa.

EU-mi inatsiseqarnikkut nangaassuteqarnerup atorunnaarsinneqarnissaa akueralugu qallunaat taasippata, tamanna naalagaaffeqatigiinni allannguutinik kinguneqarsinnaavoq, folketingimut ilaasortaq oqarpoq innersuussutigalugu Savalimmiut nammineq tunngaviusumik inatsisiliorniartoq.

– EU-mi inatsiseqarnikkut nangaassut qularnanngitsumik Danmarkip atorunnaarsippagu tamatuma kingunerilluarsinnaavaa Danmarkip Savalimmiullu akornanni aaqqiissutinik nutaanik nassaarniarnissaq, Sjúdur Skaale oqarpoq.

Nangaassuteqarneq allanngortillugu

Sjúdur Skaalemut akissummini Inatsisinik atortitsinermut ministerip eqqaasitsissutigaa inatsiseqarnikkut nangaassuteqarneq atorunnaarsittariaqassanngitsoq, namminerli qinigassanngortinneqarsinnaasoq.

Allanngortinneqarneratigut Danmarki suliassamiit suliassamut aalajangiisarsinnaavoq inatsiseqarnikkut suliniummut suleqataarusunnerluni.