Namminersorlutik Oqartussat 88 mio. koruunit nalingannut timmisartortitsisimasut
Namminersorlutik Oqartussat coronap ajornartorsiortitsinerata nalaani timmisartuussigasuartarnissamik, misissugassatut tigusanik assartuinissamut inuiaqatigiinnilu pingaarutilimmik sulisut timmisartumi bilitsissaannut pisariaqartitsisimapput. Pisariaqartitallu taakku juunip aappaata tungaanut Namminersorlutik Oqartussanut 88,7 millioner koruuninik naleqarsimapput. Tamanna paragraf 37 nappertorlugu apeqqummut akissuteqarnermi ilisimatitsissutigineqarpoq.
Pele Brobergip (PN) paragraf 37 naapertorlugu apeqqutigisimavaa, Air Greenland Covid-19-ip atugaanerani Naalakkersuisunik isumaqatigiissuteqarnermini, Nunatta Karsianit aningaasanik qanoq annertutigisunik pissarsisimanersoq.
Akissuteqarnissamut Peqqissutsimut Naalakkersuisoqarfimmit ilanngussassamik pissarsisoqarsimavoq, Namminersorlutik Oqartussat ilisimatitsipput.
- Ilanngussassaq 2020-mi juunip aappaani pissarsiarineqarpoq: 2020-mi juunip aappaani, Covid-19-ip malitsigisaanik Air Greenlandip ajornartoornermi timmisartuussisarnissaanik isumaqatigiissutinut tunngatillugit 88,7 mio. koruunit naatsorsuutinut nalunaarsorneqarsimasut, akissuteqaatigineqarsimavoq.
Akikinnerusimasinnaanngila?
Pele Broberg isumaqarami akikinnerusumik iliuuseqartoqarsimasinnaangaluartoq apeqquteqarsimavoq.
- Naalakkrsuisut pisuni makkunani allatut eqqarsarlutik, Danmarkimiit Kalaallit Nunaannut suliffeqaffiit allat timmisartuussisinnaanerannik misissuisimannginnerat uggornarpoq, Pele Broberg Sermitsiaq.AG-mut oqarpoq.
Namminersorlutik Oqartussat aningaasanik qanoq amerlatigisunik atuisimanerisa saniatigut Pele Brobergip paaserusussimavaa, ilaasussaagaluit qassit corona pissutigalugu bilitsiminnik utertitserusussimanersut, aamma tamanna Air Greenlandimut qanoq akeqarsimanersoq. Namminersorlutilli Oqartussat tamanna akissuteqarfigisinnaannginnerarpaat, una tunngavigalugu:
- Air Greenlandip sullitaasalu akornanni niuernermut tunngassuteqartoq apeqqutigineqarpoq. Naalakkersuisut taamaammat apeqqut akisinnaanngilaat.
Timmisartuutileqatigiiffik Danmarkimi akuersissummik pissarsiniassasoq
Pele Brobergip ilanngullugu paaserusussimavaa, timmisartuutileqatigiiffiit allat Kalaallit Nunaannut Kalaallillu Nunaanniit siunissami timmisartuussisalersinnaanerat eqqarsaatigineqarsimanersoq.
Tassunga atatillugu akissuteqaammi innersuussutigineqarpoq, Kalaallit Nunaannut timmisartuussissagaanni akuersissuteqartoqartariaqartoq aamma tassunga atatillugu ingerlaarfissamut akuersissuteqartariaqartoq, tassa silaannakkut angallassineq suli tiguneqanngimmat, Danmarkimi Trafik-, Bygge- og Boligstyrelsenimut qinnuteqaqqaartoqartussaasoq.
- Akuersissuteqarnermut atatillugu politikkikkut aningaasaqarnikkullu kinguneqaataasinnaasut pissutigalugit, Trafik-, Bygge- og Boligstyrelsenip qinnuteqaatinik suliaqarnerani Namminersorlutik Oqartussat tusarniaaffigineqartarput, akissuteqaammi allassimavoq.