Namminersorlutik Oqartussat aamma GME Sydkorea-mukaqatigiissapput
Qammammi tullermi Sydkorea-mukarnissamut Greenland Minerals and Energy peqataassaaq
Kalaallit aallartitaat Naalakkersuisut siulittaasuat Kuupik Kleist, Inuit Ataqatigiit, siuttoralugu decembarip 12-anniit 15-iannut tikeraarnissaanni Greenland Minerals and Energy, GME, peqataassaaq.
Tikeraarnermi namminersorlutik oqartussat australiamiullu ingerlatsiviat GME qaqutigoortumik peqatigiissapput, GME soqutigisaqarmat sydkoreamiunik aningaasaliisartunik isumaqatigiissuteqarnissani. Sydkorealu aamma killormut annertuumik soqutigisaqarpoq.
Tassami Sydkorea nunatta uranianik perusuppoq nunap nukissiorfiinut atomitortunut, aatsitassallu qaqutigoortut sydkoreap suliffissuaqarfiini pingaaruteqarlutik, aatsitassat tamakkua assersuutigalugu atorneqarsinnaammata telefoninut angallattakkanut, assiliivinnut fladskærminullu kiisalu Sydkoreami biililiorfiit pingaarnersaata Hyundai-p biilinut innaallagissamoortut hybrid-illu motooriinik tunisassiorneranut, taamatut allappoq Berlingske.
Atuaruk "Kuupik akisilluni tikeraarpoq"
Nunatsinnit tikeraartoqassaaq sydkorap præsidentiata Lee Myung-Bak-ip septembarimi Nunatsinnut tikeraarnerata kingorna.
Kuupik Kleistip tikeraarnermini ilagissavai atsitassanut inuussutissarsiornermullu Naalakkersuisoq Ove Karl Berthelsen aamma ilinniartitaanermut ilisimatusarnermullu Naalakkersuisoq Palle Christiansen kiisalu Nunatsinni ingerlatsivinnit aallartitat.