Namminersorlutik Oqartussat Amerikap Avannaanik suleqateqarnerunissaq pingaartippaat
Namminersorlutik Oqartussat Amerikamut Avannarlermut attaveqarnertik nukittorsarniarpaat, Amerikami Avannarlermi Issittumi Oqallittarfiup pilersinneqarnerani ineriartortinneqarneranilu aamma siuttuussapput. Aammattaaq Kalaallit Nunaat Ottawami sinniisuutitaqarfimmik pilersitserusuppoq.
Nunanut allanut tunngasutigut Namminersorlutik Oqartussat suliniutaasa pingaarnerpaat ilagaat Alaskami, Yukonimi, Nunap immikkoortuini avannarlerni, Nunavummi, Nunavimmi Kalaallit Nunaannilu naalakkersuisut inatsisartullu suleqatigiinnissaat.
Amerikap avannaani Issittumi oqalliffik
Suleqatigiinnissamut periarfissat kalaallit isaannit isigalugit:
Ilinniartitaaneq
Ilisimatusarneq
Silap pissusaa
Takornariartitsineq
Nukissiutit
Assartuineq
Attaveqaqatigiinneq
Kulturi
Meeqqat inuusuttullu
Killilersugaanngitsumik angallassinnaaneq
Pisuussutit uumassusillit uumassuseqanngitsullu
- Aporfiit, ineriartorneq aaqqiissutissallu pillugit nunap immikkoortuini naalakkersuisut inatsisartullu naapittarnissaat eqqartuisarnissaallu tamatumani siunertaavoq. Peqatigiinnerup alliartorneratigut erseqqissisareerpoq Amerikami Avannarlermi sumiiffiit assigiinngitsut assigiinngissuteqaraluarlutik taamaattoq sorpassuarnik assigiinnik periarfissaqarlutillu aporfissaqarmata. Tamarmik issittumiipput, silap pissusia atugarput tamatigungajak assigiipput tamattalu Issittup Imartaanut sineriaqarpugut, 2024-miit 2033-mut periusissiami allassimavoq, tassanilu Kalaallit Nunaata nunanut allanut, isumannaallisaanermut illersornissamullu politikkia sammineqarpoq – Issittumi periusissiaq.
Iluaqutaangaassasoq
Unammillernartut periarfissallu pillugit inuiannik assingusumik inissisimasunik eqqartueqateqarneq aalajangiisartutsinnut iluaqutaangaassasoq oqaatigineqarpoq, tamatumunngalu atatillugu assingusumik oqallittarfimmik pioreersumik innersuussivoq: Nunat Avannarliit Siunnersuisoqatigiivi aamma Nunat Avannarliit Ministeriisa Siunnersuisoqatigiivi.
Nunatta Amerikami avannarlermi naalagaaffiit issittumiittut, nunap immikkoortui, naalagaaffiillu ilaat Amerikap Avannarliup Nunavittaani Issittumiittut Oqaloqatigiittarfissaannik pilersitsinissaq siunertaralugu attaveqarfigissagai nalunaarusiami 25-nik quppernilimmi allassimavoq.
Nalunaarusiami aamma ersersinneqarpoq ingammik sanilerisaq kitaaniittoq soqutigineqartorujussuusoq: Canada.
Kalaallit Nunaat Ottawami sinniisuutitaqarfittaassasoq Canadalu nunami maani generalkonsulatitaarsinnaaneranik kajumissaarneqarniartoq oqaatigineqarpoq.