Namminersorlutik oqartussat IT-kkut suli ajornartorsiortut
Namminersorlutik oqartussat qitiusumik allaffissuaqarfimmi IT-kkut unioqqutitsilluni isertoqarsimanera ataasinngornermi suli ajornartorsiortitsivoq. Ajornartorsiutip aaqqinnissaa ullorpaalunni sulissutigineqaratarsinnaavoq.
Namminersorlutik oqartussat tallimanngormat nalunaaruteqarput qitiusumik allaffissuarmi atortorissaarutinut unioqqutitsilluni isertoqarsimasoq. Qitiusumik allaffissuarmit avammut attaveqarneq matuneqarallartoq, ataasinngornerullu, tassa ullumikkut, tungaanut matoqqatinneqassasoq nalunaarutigineqarpoq.
Sulili ajornartorsiuteqartoqarpoq. Namminersorlutik oqartussanut mail-it attavigineqarsinnaanngikkallarput, oqarasuaatillu attavii aamma kipisaqattaarlutik.
- Ajornartorsiutit aaqqinniarlugit suligasuartoqarpoq, Namminersorlutilli Oqartussanit naatsorsuutigineqarpoq pingasunngorpat iluarsiisoqareersimassasoq, Naalakkersuisut siulittaasuata naalakkersuisoqarfiani attaveqatigiinnermik immikkoortortaqarfik ilisimatitsivoq.
Ajornartorsiutaasut pingasunngorpaatinnagu aaqqinneqarsimassappata, soorunami nalunaartoqarumaartoq ilisimatitsissutigineqarpoq.
Annertunerusumik paasissutissanik piumalluni Sermitsiaq.AG-p Digitalimik Sullissinermut Aqutsisoqarfik attaviginiarsimagaluarpaa, iluatsinnaguli.