Namminersorlutik Oqartussat missingersuutaat: Sinneqartoorneq annertunerusinnaasoq

Ukiup qaammatai qulingiluat ingerlareersullu DAU ingerlatsinermi sinneqartoorutit 2023-mi naatsorsuutigisamit 16,1 milliuunit koruuninik amerlanerussasut aningaasaqarnermut naalakkersuisoqarfimmit naatsorsuutigineqarpoq. Aningaasanut inatsimmi sinneqartoorut 10,7 milliuunit koruuniussasoq missingiunneqarsimagaluarpoq.

Nalorninartut arlaqarsinnaasut

Sinneqartoorutilli amerleriarsinnaanerinik killiffissiuinerup takutitaa arlalitsigut nalorninartunik aallaaveqarpoq, ukiullu naanissaanut naatsorsuutinit inerniliussaq pitsanngoriarsimanngikkuni ajorseriarsinnaasoq, aningaasaqarnermut naalakkersuisoqarfik erseqqissaavoq, tassani akileraanikkut isertitat amerlassusaat aammalu pisortanit pensionisianut tunngasut naatsorsuutigisamit nikinganerusumik inerneqarsinnaanerat Naalakkersuisoqarfiup tikkuarpai.

Missingersuutigineqartuni takuneqarsinnaavoq naalakkersuisoqarfiit sisamat missingersuutinik malinninniarnerminnut ilungersunartorsiornerusut, sippuingaatsiarlutillu atuinerusimasut.

Missingersuutinik qaangiinerpaaq

Isumaginninnermut, Suliffeqarnermut Nunamullu namminermut tunngasunut Naalakkersuisoqarfik missingersuutit qaavatigut sippuinerpaasimavoq. Naalakkersuisoqarfiup naatsorsuutigaa aningaasat missingersuutit 60 milliuunit koruunit tungaannut qaangerlugit atorneqassasut. Tassani utoqqalinersiaqartunut erninermullu atatillugu sulinngiffeqarnermusiaqartunut aningaasartuutit peqqutaanerpaapput.

Peqqissutsimut, aalisarnermut/nunalerinermut aamma ineqarnermut/attaveqaasersuinermullu naalakkersuisoqarfiit missingersuutinut sanilliullugu atuineroqataasimapput, taakku 10 mio. kr., 5,2 mio. kr, aamma 6,5 mio. kr.-inik maannamut sippuereersimagamik.

Akitsuutit isaatitsinerupput

Naalakkersuisoqarfiit ilaanni sippuilluni atuisoqarnissaa naatsorsuutigineqalereeraluartoq, sinneqartoorutissatut missingersuutigisat 68 mio. kr.-nik pitsanngoriaateqassasut aningaasaqarnermut naalakkersuisoqarfimmit tagginneqarpoq, aningaasaqarnermullu naalakkersuisoqarfiup isertitsissutaanerusussat pingaartumik makkunanngaaneernerarpai:

• Raajanut akitsuutinit: + 12,7 mio. kr.
• Sulisoqarnermit akitsuutinit: + 12 mio. kr.
• Ikerinnarsiorluni aalisarnermit akitsuutinit: + 10,6 mio. kr.
• Ilanngaatissat ilanngaatigereerlugit ernianit: + 10,4 mio. kr.
• Talittarfinnut akitsuutinit: + 9 mio. kr.
• Naqissusiinikkut akitsuutinit: + 5 mio. kr.
• Nammineq illuliornermut tapiissutit akitsuutaat: + 3,5 mio. kr.
• Akileraartarnermi akiligassanngortitsinernit: + 3 mio. kr.
• Motoorilinnut akitsuutinit: + 3 mio. kr.
• Avatangiisinut akitsuutinit: + 3 mio. kr
• Qaleralinniarnermut akitsuutinit: + 3 mio. kr.
• Sulinermi ilanngaatinit: + 2,6 mio. kr.

Namminersorlutik oqartussat ingertseqatigiiffiutaasa sinneqartoorutaannit isertitat annertunerat pissutigalugu Naalakkersuuisut siulittaasuata naalakkersuisoqarfia 10,2 mio. kr.-nik sinneqartoorutinut annertusaataavoq.

Ilinniartitaanermut, Kulturimut, Timersornermut, Ilagiinnullu kiisalu Aatsitassanut Inatsisinillu atuutsitsinermut aamma Meeqqanut, Inuusuttunut, Ilaqutariinnullu naalakkersuisoqarfiit, aningaasanut inatsimmut sanilliullugu 1 mio. kr.-niit 5,8 mio. kr.-nit tungaannut atuinikinnerunissartik naatsorsuutigaat.

Sakkussaq pingaaruteqartoq

- Missingersuutit killiffissiuinermik malitseqartinneqartarnerat sakkussaavoq pingaaruteqartoq, taamaaliornikkut pilersaarusiornermi politikkikkullu pingaarnersiuinermi aningaasaatigineqartut qanorpiaq inissisimanersut ilisiimaaralugit sulineq ingerlanneqarsinnaassammat, aningaasaqarnermut naalakkersuisoqarfik missingersuutinik killiffissiuinermi Inatsisartunut ilisimatitsissutimini erseqqissaavoq.