Namminersorneq namminiilivinnissarlu oqaluuseraat
Immikkuullarissutigaa qaqugu Kalaallit Nunaata politikkikkut Danmarkimit pituttorsimajunnaarnissaa, Inatsisartut siulittaasua oqarpoq
Naak Australiap Danmarkimi aallartitaata James Choi'p Nuummi issatsiaq tikeraarnermi isertuutinngilaa maaniinnerminut soqutigisani pingaarnerit tassaasut Aaustraliami aatsitassarsioqatigiiffiit nunatsinni ingerlataqarsinnaanerminnut periarfissaat, tassunga ilanngullugu uranimut avataaniillu suliartortunut nunatsinni isummat, kalaallit namminiilivinnissaannik kissaataat aamma oqallisigineqarpoq.
- Danmarkimit ukiumoortumik ataatsimoortumik tapiissutinut 3,3 mio. kr.-iusunut sanilliullugu taava nunarput siunissami ungasippallaanngitsumi Danmarkimiit aningaasaqarniarnikkut kiffanngissuseqalersinnaagaluarpoq, tamanna aporfiuvallaarani qaugu nunatta Danmarkimit naalakkersuinikkut kiffaanngissuseqalersinnaanera aporfiunerussagunarpoq, Inatsisartut siulittaasua Josef Motzfeldt, Inuit Ataqatigiit, Australiamiut aallartitaanut oqarpoq.
- Danmarkimit naalakkersuinikkut kiffaanngissuseqalissagutta nunatta naalakkersuinikkut nutaanik ilissarsiornissaa piumasaqaataasussaavoq. Tamatumunnga suli alloriartoqanngilaq, imaalluarsinnaallunilu ungasinnerusoq isigalugu Danmarkimik naalakkersuinikkut peqateqarneq pitsaanerpaassasoq Danmarkip nunattalu akornanni qanimut attassuteqaatit pioreersut pissutigalugit. Kisiannili aamma namminersulivinnissamik piumasaqarneq innuttaasunit kissaatitut aallaaveqartariaqarpoq qulaaniit naalakkiutaanani.