Namminersorneq pillugu innuttaasunik ataatsimiitsitsineq
Namminersorneq pillugu Isumalioqatigiissitami ilaasortaasut suliamik inernerat nunatta kulturikkut illorsuani Katuami pingasunngornermi juunip 18-iani saqqummiuppaat.
KNR-TV-a aamma radioa Katuamiit nal. 9 toqqaannartumik aallakaatitsissaaq, tassani namminersorneq pillugu isumalioqatigiissiap suleqatigiissitaliaasa pingasuusut tamarmik immikkut isumaliutissiissutitik saqqummiutissavaat.
– Qulequttat soorlu Namminersórnerup oqartussaasui aammalu akisussaaffinnik nutaanik naalagaaffimmiit nuunneqarsinnaanerannut periarfissat, Kalaallit Nunaata Danmarkillu akornanni aningaasaqarnikkut attumassutit, pisuussutit uumaatsut pillugit nutaamik aaqqiissutissatut siunnersuutit, Namminersortut nunanut allanut oqartussaanermi pisinnaaffii, Namminersornerup ataani kalaallit innuttaasut inuiattut inatsisitigut killiffiat aamma Kalaallit Nunaata namminersulivissinnaatitaanera saqqummiisunit saqqummiunneqassapput, namminersornerusut nalunaaruteqarput.
Saqqummiussassat saqqummiunneqareerpata innuttaasut itisiliiffigineqarnissamut apeqqutinik saqqumiussisinnaatitaassapput.