Sermersooq
Namminersornerlutik Oqartussat Kommuneqarfik Sermersooq inatsisinik unioqqutitsisutut pinngitsuutippaat
Kanukoka-mit aninissamik kommunalbestyrelsip aalajangernera kommuninik aqutsinermut inatsimmik unioqqutitsinerunngilaq
Kommuneqarfik Sermersooq inatsimmik unioqqutitsinngilaq, kommunalbestyrelsi aalajangermat kommuneqarfiit kattuffiannit Kanukoka-mit aniniarlutik.
Taamatut Siulittaasup Naalakkersuisoqarfia, nakkutilliisussaatitaasutut pisimasup ingerlarnganik naliliisimasoq, kommunimut allakkatigut paasissutissiivoq.
Inatsimmik unioqqutitsisutit unnerluukkaat
Naalakkersuisoqarfiup suliassaq nammineerluni misissuiffigilerpaa, kommunalbestyrelsimut ilaasortap Peter Davidsenip, Siumut Atassullu sinnerlugit, kommuneqarfiit kattuffiannit aniniarneq isornartorsiormagu.
Politikerip Siumumeersup aalajangerneq tamanna allaat taavaa inatsimmik unioqqutitsinertut. Akerlianilli Siulittaasup Naalakkersuisoqarfia pisimasup ingerlarnganik Kommuneqarfik Sermersuumit nassuiaammik tigusaqareerluni naliliivoq, kommunip, aninerminut atatillugu, aqutsinermut kommunimik aqutsinermut inatsit unioqqutissimanngikkaa.
Suliassaq unitsippaat
Siulittaasup Naalakkersuisoqarfiata ilanngullugu paasissutissiissutigaa, pisimasoq pillugu Namminersorlutik Oqartussat iliuuseqaqqinnianngitsut.
Kommuneqarfik Sermersuup Kanukokamit aninissaa kommunalbestyrelsimi amerlanerussuteqartunit aalajangerneqarpoq, kommunit akornanni naligiissaarinerup aaqqissuuteqqinneqarnerata aaqqiagiinngissutaanera pissutigalugu, tamatumuunakkut Kommuneqarfik Sermersooq immikkut amerlasoorsuarnik aningaasartuutissinneqarmat.