Namminersornermut ataatsimiititaliami ataatsimiinneq kingulleq

Ataatsimiitaliarsuup siulittaasoqarfiata naatsorsuutigaa aprilip 18-ianni 2008 ataatsimiinneq ataatsimiititaliarsuup ataatsimiittarnerisa kingullersarissagaat.

Ataatsimiinnermi aningaasanut inuussutissarsiutillu ineriartornerannut Suleqatigiissitaliap aamma naalagaaffimmut inuillu pisinnaatitaaffiinut apeqqutinut Suleqatigiissitaliap sulinermik inerneri saqqummiutissavaat, Kalaallit Nuunaanni aatsitassanit isertitat nassuiaaserlugit, tamakkua ataatsimiititaliarsuarmi oqaluuserinissaat siunertaralugu.

Tamatuma kingorna ataatsimiititaliarsuup isumaliutissiissutini, tamatumani ilanngullugu Kalaallit Nunaata Namminersorneranut inatsisissatut missingersuut, naggataarutaasumik oqallisigissavaat.

– Naammagisimaarluinnarlugu oqaatigisinnaavarput suliassaq, naalakkersuisut siulittaasuata ministeriunerullu 2004-mi aasakkut ataatsimiititaliarsuarmut suilassiissutaat naammassingajalermat, siulittaasoqarfiullu naatsorsuutigigaa ataatsimiinnermi ataatsimiititaliarsuup isumaliutissiissutaani inassuteqaatit tapersersorluarneqassasut, ataatsimiinnissaq sioqqullugu ataatsimiititaliarsuup siulittaasoqarfia oqarpoq.

Ataatsimiititaliarsuup isumaliutissiissutini ministeriunermut naalakkersuisullu siulittaasuannut piffissami qaninnerpaami Nuummi aaqqissuussinermi tunniutissavaa, tamatumanilu isumaliutissiissummi immikkoortut pingaarnerit aamma tamanut saqqummiunneqassapput. Qaqugu tamanna pissanersoq suli aalajangerneqarsimanngilaq.

Naggataarutaasumik ataatsimiinneq aallartissaaq Folketingimi arlalinnik taaseqattaareernerup kingorna, qularnanngitsumik nal. 11, naggataarutaasumillu ataatsimiinnerup inernera siulittaasumit Jonathan Motzfeldtimit siulittaasullu tullianit Chr. Mejdahlimit Christiansborgimi tusagassiortunik katersortitsinermi saqqummiunneqassaaq, ataatsimiinnerup kinguninngua.

Tunuliaqut:

Kalaallit-qallunaat namminersornermut ataatsimiititaliarsuat 21. juni 2004-mi pilersinneqarpoq, naalakkersuisutta qallunaallu naalakkersuisuisa isumaqatigiissuteqarnerisigut. Kalaallit Nunaata maanna naalakkersuinikkut inissisimanera aallaavigalugu aammalu kalaallit inuiaat inuiaat pisinnaatitaaffiat naapertorlugu namminneq aalajangiissinnaassuseqarnerat naapertorlugu, ataatsimiititaliarsuaq qinnuigineqarpoq eqqarsaatigeqqullugu siunnersuusioqqullugulu kalaallit oqartussaasut qanoq isillutik oqartussaaffiit amerlanerusut, naalakkersuinikkut periarfissallit, tigusinnaaneraat. Ataatsimiititaliarsuaq ilanngulugu qinnuigineqarpoq Kalaallit Nunaata Danmarkillu akornanni aningaasatigut isumannaagassanut tunngatillugu aaqqissuussinermik nutaamik siunnersuusioqqullugu.